'O BIPPIblog

'E mamme chiagnarranno...

2008-04-28T13:44:00.006+02:00

'O Santuario d''a memoria a Melbourne, Australia, è nu piezzo 'e mausuleo, fravecato doppo " 'a guerra ca aveva fà fernì tutte 'e guerre ", WWI, 'a primma guerra mundiale, 'a Grande Guerra. Fuje fravecato p'avè n'anema, pruggettato comme a nu tempio greco; 'a democrazzia se penza ca è accummenciata â Grecia. Fuje fravecato pe stà llà pe sempe, pe ll'eternità. Duje ncopp'a tre 'e ll'architette fujeno pò chiammate n'ata vota a fà 'o surdato. Fuje fravecato cunvinte ca nun ce fosse stata cchiù n'ata guerra.

Ll'11° ora 'e ll'11° juorno 'e ll'11° mese, 'a Festa 'e l'Armistizzio, nu raggio 'e luce passa pe na senga e coglie 'a parola "Ammore" ncopp'a na scritta. 'A lapeta 'e marmulo, misa addò se pò vedé sulo cu 'a capa acalata, e addò nisciuna mana 'a pò tuccà, dice "Ammore cchiù gruosso 'e chisto nisciun'ommo avette".

Stu piezzo 'e monumento fuje fravecato pe fà onore ô sacrificio p''a pace. Chella pace ha durato sulo 21 anne.

Me mettette ntra 'e curone e 'e papavere d''a rimembranza, pe guardà na statua 'e pate e figlie fatta 'a Raymond Ewers. Fuje aizata doppo 'a Siconda Guerra Mundiale. M'hanno ditto ca è stata aizata d''e femmene 'e Victoria, 'e mamme, 'e figlie. M'aggio miso a chiagnere.

Je songo na mamma e 'a figlia 'e nu surdato veterano. Nun me metto scuorno d''e lacreme meje. Ogne surdato tene na mamma.

Forze ca na cultura 'e pace accummencia propeto â casa?

Kay de Lautour Scott (traduzziona 'a ll'inglese)

Lieggete 'e cummente (in inglese) 'e nu veterano pe 'e lacreme 'e na femmena.

Quanno fuje ca se ne jette 'e capa?

2008-04-27T19:13:00.006+02:00

Michael Stokely, 23, acciso ô 2000 a poche chilometre a sud 'e Baghdad. Lieggete 'e cummente ncopp'a The 48th goes to war (in inglese).

Comme fa n'ommo a se sentì appriparato pe accidere?

M'arricordo na chiacchiera cu nu giovene. Nu crestiano devoto, uno ca se tirava appriesso 'e giuvene, ca aveva fatto na vita 'e spunsabbeletà. Se vulette piglià n'anno 'e libbertà doppo lassato 'a scola pe faticà cu 'e criature 'e miezo 'a via cu 'a museca soja, dinto a n'ata città. 'E geniture suoje 'o vuleveno fà jì a ll'università e vuleveno ca se steva â casa addu lloro.

Teneva 'a passiona pe ll'aeroplane; vuleva o vulà o fà 'o miedeco, ma nun vedeva 'e culure. Accussì penzaje 'e addeventà paramiedeco, e vulà pe succorrere 'e ferite ncopp'â muntagna. Comme 'a gire e comme 'a vote, vuleva fà na carriera pe se mettere ô servizio 'e ll'ate.
Nce steveno poche sorde â casa. 'A famiglia lle vuleva fà piglià nu diploma a ll'università. 'E forze armate nc'avesseno pututo dà na cosa 'e sorde a fine mese e na lauria. Trasette dint'a ll'esercito comme a n'ufficiale cadetto, a 18 anne. Arrivaje a nu punto ca avette 'a affruntà 'a dimanna si era appriparato a accidere n'ato crestiano, o a cumannà a ll'uommene suoje 'e accidere.
Firmaje.

N'ato studente vuleva vulà e jette dint'a ll'aviazziona p'avè na lauria, p'avè quacche avventura, pe stà nzieme a ati giuvene. Nce dicettero ca nun puteva vulà cu n'arioplano particulare pecché teneva 'a coscia troppa longa ntra cianco e denucchio e stu fatto ll'avesse purtato via na coscia casomaje avesse avuto zumpà fora 'a ll'arioplano. Adoppo ca nce penzaje nu poco ncoppo, se pagaje sul'isso ll'università.

Nunn'è ca na scelta na vota è "justa" e na vota è "sbagliata". Sulo m'addimanno, quann'è ca n'ommo ca dice 'e essere crestiano e pacifista, ca vò aiutà 'e criature 'e miezo 'a via cu 'a museca soja, firma dicenno ca se sente appriparato p'accidere, che è succieso p''a via?

Na cultura 'e pace accummencia cu na distribuzziona d''a ricchezza fatta buono? O accummencia quanno ll'ammore e 'o rispetto conteno cchiù 'e chello ca vulimmo addeventà?

Kay de Lautour Scott (tradotto 'a ll'inglese)

14 anne e quaccosa è cagnato. ?

2008-04-25T09:33:00.003+02:00

Videte 'o vidio

D''o blog Gnuwanda Lounge, 7 'e abrile 2008

nu punto e nu punto interrogativo.
Oggi è 'o quattuordicesimo anniversario 'e quanno accummenciaje 'o genocidio ruandese. "Accummenciaje" se fà pe dicere, pecché 'a verità 'o genocidio era accummenciato già quacche anno primma facenno attenziona pure ê sputazzelle 'nterra, ogge (anzi ajere sera ê ll'8) hanno jettato abbascio ll'aereo d''o presidente, e 'a llà a jì annanze 'e 100 juorne 'e pazzaria ca hanno affucato stu paese [800mila perzone accise]. 14 anne, oggi accummencia 'a semmana d''a memoria, luce dilicate, niente museca, sta semmana nu senso 'e lutto addò vaje vaje pe tutto 'o paese, nun nce sta niente a dicere. 'O paese 'a 14 anne è cagnato e pure assaje, nun nce sta assaje 'a dicere pe capì si overamente 'e gente hanno fatto pace, je dicesse nu poco sì e nu poco no. Certamente pe tutto 'o paese nce stanno pace e sicurezza, ammacaro pavato cu na democrazzia a ll'afrecana, addò 'o capo piglia vote bulgare 'a 98%. Ma pure è certo ca esisteno fuculare ca scumpararranno na vota e pe senpe cagnanno doje generazzione, ati 15 anne forze, p'arrivà o a n'ata cosa o 'a sta benedetta pace (cu tanto 'e vision 2020 pe mmiezo). Mò stanno piglianno tutte 'e muorte d''o genocidio e chiano chiano 'e stanno atterranno dinto 'e memoriale. Centinara 'e migliara 'e cuorpe venarranno spustate ogge e l'anne a venì p'accucchià nzieme tutte 'e muorte d''a pazzaria dinto 'e stessi pizze. Ogge attocca pure ô marito 'e Valerie. 14 anne... nun saccio si abbastasseno pe sentì cchiù poco dulore, certamente so' abbastate p'accummencià n'ata vota a sperà dint'a nu futuro 'e n'ata manera, e spero pe stu paese ca accussì sarrà...

'A siconda cosa ca m'aggio mparato

2008-04-24T09:53:00.007+02:00

Cultura 'e pace vò dicere pure dà spazzio a chille ca arraggioneno e 'a penzeno 'e n'ata manera. Jenno 'a vedé buono sulo sentenno 'o penziero 'e ll'ate putimmo accanoscere 'e sbaglie 'e nu raggiunamento d''o nuosto.
Ncopp'ô Los Angeles Times d''o 9 'e marzo d''o 2008, aggio truvato n'articolo ca s'adda leggere sano sano.

Tutte 'e guerre sò state vennute [a ll'opiniona pubbreca] ma 'a siconda guerra mundiale, ca 'a gente s'arricurdava ancora 'o carnaggio d''a primma, se schiattajeno 'ncuorpo pe 'a vennere. Roosevelt e Churchill faticajeno assaje buono, e è 'a tanno ca 'e buscie lloro nce fanno cumpagnia.

“Human Smoke” 'e Nicholson Baker è nu libbro fatto cu criterio e cu tutte 'e carte ô posto lloro, e nce spieca ca 'a siconda guerra mundiale è stata una d''e buscie cchiù grosse e cchiù fattapposta d''e tiempe moderne. Sicondo 'a mitologgia 'e mò, 'e guvernante ingrese e americane comme a tante pachiochere penzaveno 'e putè arraggiunà cu cierti fasciste 'e merda comme 'o tetesco Hitler e 'o giappunese Tojo. Na vota mise 'nfaccia a sta debbulezza, Hitler e Tojo cercajeno 'e conquistà ô munno, e accussì 'e State Aunite e ll'Inghilterra se vedetteno custrette a ausà 'a forza militara pe 'e fremmà...

Lieggete ll'articulo sano sano tradotto ncopp'a comeDonChisciotte.

Overo nunn'a vuó na Coca Cola? Grazzie no!

2008-04-23T14:24:00.009+02:00

Â Colombia songo vintiduje 'e sindacaliste accise d''o principio 'e ll'anno. Urdema vittima Jesùs Caballero, sotto sequestro d''o 16 'e aprile e truvato muorto miezzo 'a na via 'e nu villaggio ô nord 'e Bogotà, cu belli signe 'e turtura.
Caballero era nu dirigente d''o sindacato «Servicio Nacional de Aprendiaje», era stato ntra chille ca ô 6 'e marzo passato hanno vuttato annanze na manifestazziona chiena 'e gente contr'ê paramilitare 'e ll'estrema destra e contr'ê muorte 'e stato, comme a chilli sindacaliste ca veneno accise pecché vanno cercanno 'e deritte pe 'e faticature.
Annanze a tutto nce sta 'a Coca Cola.
7 sindacaliste ca faticaveno dint'ê stabbelimente d''a Coca Cola so' state accise st'urdeme diece anne. Ati 5 nun so' arrivate a lle fà fora ma nc'hanno pruvato. 61 so' state menacciate 'e morte. 74 faticature so' state rapite e turturate. Accussì è juta ca 'a Coca Cola Company accatta ogge pe quatto sorde 'a fatica d''e Colombiane e venne a nuje vippete sapurite e carustuse e na pubblicità fatta troppo bella cu Babbo Natale comme a testimonial.
Pure si 'o 97% 'e chisti micidie rummane senza curpevole, 'o Presidente colombiano Alvaro Uribe ha fatto 'a prumessa 'e nu veveraggio a chi lle porta 'e spunsabbele, dicenno ca 'o scopo d''e guerrigliere paramilitare è «vuttà 'a merda 'nfaccia ô Paese pe nun fà fà 'o trattato 'e libbero cummercio cu 'e State Aunite», chillo ca isso e 'e State Aunite nce teneno assaje.
Pe fà na bella linea sott'ê parole d''o Presidente, propeto ajere hanno arrestato Mario Uribe, 'o frate cucino d''o Presidente, cunzigliere suojo e senatore d''o stato: ll'accusa dice ca ha nciarmato cu 'e squadrune d''a morte 'e ll'estrema destra, 'e stisse ca 'o Presidente 'e vulesse dà 'ncuollo. Ammeno isso accussì ha ditto.

N'avvertimento ncopp'ô magnà e a ll'agrocarburante

2008-04-22T14:37:00.005+02:00

Ogge, ncopp'a BBCNEWS:

Parlanno ê Nazzione Aunite a New York, 'o Presidente boliviano Evo Morales ha ditto ca 'o sviluppo d''e biocarburante è juto 'nculo ê cchiù puverielle d''o munno. E 'o Presidente d''o Perù, Alan Garcia, ha ditto ca ausà 'e turrene p''e biocarburante ha miso 'e puverielle dint'â cundizziona ca nun ponno magnà.
Pe ntramente, addu 'o Primmo Ministro vretanneco Gordon Brown se so' ncuntrate pe parlà d''a puliteca ca hanno'a fà ll'europeje pe vuttà areto ê biocarburante.
'O fatto è ca pe tutto 'o munno cresceno 'e prezze d''o magnà e nce sta na paura ca 'o sviluppo d''e biocarburante putesse ammancà 'a pruduzziona d''o magnà cchiù nicissario. 'O prezzo mundiale 'e grano, riso e granone è addeventato quase 'o doppio st'urdeme anne, e 'o latte e 'a carne ancora 'e cchiù d''o doppio dinto a cierti paise.Chisti aumiente, accucchiate cu 'e prezze assaje avete d''o cisto, fanno fà sempe cchiù burdello dint'a puliteca d''e paise d''o munno ca cchiù stanno nguaiate.
Arrevuote so' succiese pe mmezo d''o magnà ô principio 'e stu mese a Haiti, ca va assaje suggetto a fà venì 'a fora 'o magnà e 'a benzina, e ammeno seje perzone so muorte e pure nu peacekeeper d''e Nazzione Aunite nc'è juto pe sotto. E' succieso 'o burdello pure ô Burkina Faso, ô Camerun, a ll'Egitto, a ll'Indonesia, â Costa d'Avorio, â Mauritania, ô Mozambico e ô Senegal.

'E "biocarburante" hanno fatto prumesse esaggerate 'e purtà 'o munno fora 'a ll'auso d''e carburante fossile. Diceno ca fanno meno tuosseco, so' rinnovabbele, e ca a cultivà nu sacco 'e turreno pe primma cosa a granone e soia sarrà nu buono passo annanze pe zucà tutto 'o CO2 ca sta dint'a ll'atmosfera. Nun jammo 'e pressa, diceno cierti scienziate ca 'a penzeno 'e n'ata manera. Mprimmese, diceno, a lle mettere uno vicino a n'ato nun nce sta na prova ca 'e "biocarburante" fanno meno gas serra d''e combustibbele fossile. Ll'ata preoccupazziona è che pò succedere â natura ncopp'ô pianeta. Dalle e dalle a cultivà pe fà biocarburante se putesseno arresecà 'e fureste pluviale, ammancà 'e riserve d'acqua pe bere, sfrantummà ll'habitat d''e bestie d''a furesta e, pe fernì, se putesse tuccà a pruduzziona d''o magnà. Se tratta 'e fà na scelta a quale è 'a cosa cchiù mpurtante: 800 miliune 'e perzone pe tutto 'o munno ca teneno 'a machina e ll'auseno, o miliarde 'e ata gente ca campeno a vienetenne e già spenneno 'a mità d''e sorde d''a jurnata p''o magnà.

Ll'esperienza puliteca d''o Suddamerica

2008-04-22T14:35:00.002+02:00

Na vota 'o Suddamerica era comme dicere dittatura, maluguvierno, puvertà, sfruttamento d''e puverielle. Ogge nun credo ca 'a rialtà d''o cuntinente è cagnata. Ma si facimmo attenziona a leggere 'e pampuglie d''a puliteca suddamericana venimmo a sapè ca quaccosa sta nascenno pure si nunn'o capimmo. Pe ntramente ca 'e democrazzie occidentale addeventeno sempe nu poco 'e cchiù 'democradure' mediatiche affucate dint'ê legge d''o guadambio, mmece tutta ll'area latino-americana vede 'e venì na primmavera sucialista ca s'arretrova dint'a ll'elezziona 'e ajere ô Paraguay, ca hanno purtato ô putere ll'Alianza Patriotica por el Cambio, n'accucchiata 'e sinistra cumannata d''o "vescovo russo" Fernando Lugo, doppo a 61 anni 'e dittatura o pseudo-democrazzia 'e chille 'aumma aumma' d''o partito Colorado.

Ogge – 'a fora d''a Colombia 'e Uribe - tutta ll'America Latina è guvernata 'a leader 'e sinistra radicale (Venezuela, Bolivia, Ecuador, Argentina) o pure 'e centro-sinistra (Cile, Brasile, Uruguay, Perù).
Si chesta è na bona nutizzia pe ll'America Latina 'o jammo a sapé ntra nu poco 'e tiempo. Lula, ô Brasile, ha fatto già ll'esperimento 'e quanto è difficile mettere nzieme ‘e prumesse elettorale cu 'a rialtà d''o guvierno. Chavez, ô Venezuela, tene d''a parte soja 'a gente ma stesso 'a gente ll'ha ditto che no ncopp'ô programma 'e cagnà 'a custituzziona.

'O Paraguay ogge è puveriello assaje e sta propeto arretrato, ma però tene assaje ricchezze tutte mmano a na mappata 'e famiglie. Chi vò, putimmo fà na scummessa ncopp'ô futuro 'e stu Paese.

Quaccheduno sape addó sta 'o Sahara Occidentale?

2008-04-21T16:10:00.006+02:00

'A fotografia fa abbedé 'o campo profughe 'e Dakhla addó campeno 'e Saharawi, vicino a Tindouf, dint'ô sud-ovest e ll'Algeria.

'O Sahara Occidentale è stato accupato d''o Marocco ô 1975. Tanno è accummenciata na guerra ca ha acciso 11.000 perzone. 'E profughe saharawi d''o Sahara Occidentale arraro fanno nutizzia, ma dint'a ll'urdeme 30 anne nzi a 165.000 profughe hanno tirato annanze dint'a campamiente sperdute mmiez'ô deserto, in Algeria, p''a cchiù grossa parte totalmente suggette 'a ll'aiute umanitarie.
'O 14-16 'e dicembre d''o 2007 hanno fatto 'o 12° Cungresso d''a SADR (Repubblica Saharawi senza territorio). Cchiù 'e 1500 delegate saharawi hanno arraggiunato si zumpà 'o fuosso e accummencià n'ata vota â lotta armata, jì annanze cu 'e neguzziate o mettere mano â priparazziona d''a guerra senza levà mano ê neguzziate pe ntramente.
Po', 'o 7-9 'e gennaro d''o 2008 hanno fatto n'ata vutata 'e neguzziate 'e pace (Manhasset III) a Manhasset, poco fora d''a città 'e New York. 'O mediatore d''e Nazzione Aunite Peter Van Valsum ha ditto ca 'e doje parte vanno annanze uno a levante e n'ato a punente ncopp'â quistiona e ll'indipendenza. 'O Marocco ncoccia ca s'adda accanoscere 'a suvranità soja ncopp'ô Sahara Occidentale e ha ditto chiatto chiatto ca ll'indipendenza nunn'è cosa pecché 'a gente saharawi vive dint'a quatto Paise differente e nu referendum nun se pò propeto organizzà. D''a parte soja 'o Polisario dice ca 'o status finale d''o Territorio adda essere diciso cu nu referendum addó nce sta pure 'a pussibbeletà e ll'indipendenza.
A marzo 'e Nazzione Aunite hanno vuttato annanze na quarta vutata 'e neguzziate ma pure sta vota hanno fatto ca 'a cera se struja e 'a prucessione nun cammina.

Nu juorno 'e chiste 'e giurnale nce diciarranno ca n'ata guerra è accummenciata e tanno va' truvanno chi sape chi è, che cosa e pecché!

Cia', Pippa

2008-04-19T10:36:00.003+02:00

D''o blog 'e Pino Scaccia, 12 abbrile 2008.

Atterrato sott'a poche centimetre 'e terra, 'a pulissa turca ha truvato sta sera 'a via d''a mezanotte d''o puosto, 'o cadavere annudo 'e Giuseppina Pasqualino, ll'artista milanese 'e 33 anni scumparsa d''o 31 'e marzo passato 'a Istanbul addó era arrivata assieme a n'amica italiana. Na nutizzia 'e cronaca comm'a tante, na guagliona accisa, 'o fatto curiuso 'e chillu vestito 'a sposa. Ll'amice 'a chiammaveno Pippa e 'o sujo era nu proggetto 'e pace, chillu vestito teneva nu senzo priciso. Nce sta 'o sitio Bridesontour ca spieca 'o pruggetto: "Nu suonno mpurtante e chino 'e poesia. 'O suonno 'e traverzà cu ll'autostop 'e Paise ca urdemamente so' state scunvolte d''a guerra e ca nun sempe mò stanno 'ngrazzia 'e Dio. 'O viaggio nun fosse comme a nu viaggio normale 'e duje femmene curaggiose, ma 'o viaggio 'e duje zite assaje belle vestute pe nu spusalizzio ca forze è stato fatto già o ca nun se farrà o forze 'o spusalizzio è propeto 'o viaggio. Nu spusalizzio cu 'a terra, 'a pace, cu tutta 'a gente, o jenno truvanno 'o zito? Chi è stu zito e che vò dicere? Duje so' 'e zite, duje è 'o nummero e ll'incontro, 'e ll'uno cu n'àto, d''a femmena, d''o pare, d''o multiplo, d''a differenza. Nu gesto comm'a chisto se pò leggere dint'a mille manere. 'A zita è 'o janco, 'a luce, 'a femmena, chella ca dà 'a vita, e allora è 'a pace, ll'amore e 'a purezza". Nu suonno sfrantummato, 'e na manera ca peggio 'e chesta nun se pò. 'O munno ancora nunn'è appriparato a ll'idea d''a pace. Cia', Pippa

Nuje e 'a crisi mondiale d''o magnà

2008-04-18T11:44:00.006+02:00

Videte 'o servizio RAI Report

Fa quacche juorno Marco Revelli [Prufessore 'e Scienza d''a puliteca a ll'Università d''o Piemonte orientale] s'addimannava comme pò essere ca nisciuno d''a puliteca ha cunziderato ll'allarme d''a FAO a Roma ncopp'â crisi mondiale d''o magnà propeto ô juorno ca se chiudeva 'a campagna elettorale italiana. Dint'a sti juorne, dint'a trenta paise d''o sud d''o munno, ncopp'a tutto Egitto e Haiti, 'a gente sta facenno 'o burdello.
Ma però pe ntramente â fine d''a semmana d''e vutazzione in Italia, hanno pure trasmesso ncopp'â RAI ô principio d''a serata na puntata 'e Report dedicata ô magnà: mpurtà nu chilo 'e sparece d''o Perù ca viaggeno cu ll'aeroplano nzi ô piatto nuosto, hanno ditto 'e redatture d''a trasmissione, vò dicere lascià pe dint'a ll’atmosfera seje chile 'e CO2; pe ntramente pavammo otto euro ô chilo 'e carote grattate ca stanno dint'a na vaschetta ['e plastica], nfromme ca a chille ca 'e pruduce lle costeno poche centesime. S'adda dicere ca 'a stu prezzo nun pavammo manco chello ca pava 'a natura a lle ntussecà aria, terra e acqua.
Report ha cuntato pure 'e cierte manere differente 'e fà 'e cose: ll'accatto solidale ['a tanno centinare 'e perzone hanno accummenciato a chiammà chille ca fanno 'e GAS, Gruppi di Acquisto Solidale], 'o magnà e 'e ristorante a «chilometro zero», 'a cultivazziona biologgica d''a terra. Forze 'a manera 'e cultivà 'a terra facenno cu ll'industria [ca vò dicere pesticide, mpurtà 'e prudutte fora d''a staggione 'a ll'ata parte d''o munno, se piglià 'a terra pe nce fà ll'agrocarburante], tutto pe fà 'o bene d''e multinazzionale 'e ll’agrobusiness, ha fatto «'a fine d''e carcioffole». Cert'è, sta crisi d''o magnà e 'o nteresse 'e migliare 'e perzone a magnà robba sapurita, cu bona salute e senza fà male a nisciuno, diceno ca accussì non putimmo jì annanze.

Cronaca 'e na dittatura

2008-04-17T10:59:00.003+02:00

Burma, Birmania, Myanmar...

Ô 2007 l'aumiento d''a benzina ha fatto aumentà 'e mercanzie cchiù nicissarie, nzi a fernì cu ll'ennesima prutesta d''e muonace buddiste addó se so' mise mmiezo pure 'e studiente e ati categurie. Pruteste ca so' state buono mazzuliate d''o riggime militare d''o Generale Than Shwe ca mantene nu putere ca nun tene limmete, doppo a anne e anne 'e dittatura militare "sucialista".

Fa poche juorne 'e cinquantaquatto membre ncaricate d''o guvierno birmano 'e scrivere 'a Custituzziona nova hanno vuttato 'o capo 'nterra e 'e 194 paggine se putarranno accattà a 1000 Kyat, un euro, dint'ê libbrarie d''o guvierno. Tutte chille ca teneno bastante sorde a spennere teneno 'a pussibbeletà e se leggere 'o scritto primma d''o referendum p''o fà addeventà legge, fissato p''o 10 'e maggio ca vene. Pe dint'â rezza se nzegnano pressione e menacce bell'e buone fatte d''e surdate â povera gente pe lle fà vutà che sì.

'E partite 'e ll'opposizziona so' state fatte fora quanno s'è trattato 'e scrivere 'a custituzziona.,Chesta mò dà cchiù forza ancora ê surdate 'nculo a ll'opposizziona e ê minoranze. Dint'ô parlamiento birmano ca va a venì 110 seggie ncopp'a 440 dint'â cammara alta e 56 ncopp'a 224 dint'â cammara bassa sarranno p''e surdate. E nunn'è fernuta! Hanno miso nu «muro etnico»: nisciuno puliteco nzurato cu nu furastiero pò essere eletto a nisciuna parte. Chesta pampuglia fa fora 'a leader d''o partito 'e ll'opposizziona Aung San Suu Kyi ca è vedola 'e nu prufessore vretannico.

'A jonta militare ha miso 'a coppa nu 'no' ô fatto 'e fà stà osservature ONA pe ntramente ô referendum e 'e vutazzione 'e giugno. Sulamente 'o guvierno cinese lle putarrà dà na mana.

'O Nepal d''a guerra â pace

2008-04-16T11:18:00.007+02:00

Chist'ommo se chiamma 'e na manera cumpricata ma tutte quante 'o sapeno comme Prachanda, 'a Fera.
Ha cumannato pe diece anne a na diecina 'e migliare 'e Maoiste nepalise dint'a na guerra sanguegna contro 'a pluricentenaria munarchia e 'e cientomila surdate suoje, dint'a nu Paese addó viveno quase 30 miliune 'e gente. 'A guerra ha fatto cchiù 'e 13mila muorte, nce sò state abbuse, rapimiente, turture, carnagge, cose 'a fà rizzà 'e capille 'ncapa. Tutte 'e duje ll'esercite hanno mazzuliato addó cojo cojo e 'a povera gente nc'è juta pe sotto, comme semp'è.
Ô 2006 'e partite 'e ll'opposizziona e 'e Maoiste s'hanno accurdate ncopp'a nu programma democratico addó pe primma cosa vonno levà 'a miezo 'a munarchia, e 'a guerra è fernuta. 'O Re ha fatto scennere 'o paraviso 'nterra pe scassà tutte cose ma all'urdemo a tutto 'e vutazzione democratiche se so' fatte, guardate 'a na chiorma 'e osservature internazzionale cumannate 'a Jimmy Carter, ll'ex Presidente d''e State Aunite. 'O guverno americano mantene 'e Maoiste nepalise dint'â lista d''e terruriste!
'A povera gente, cu tutto chello ca s'hanno pigliato ncuollo, so' addeventate prutagoniste e hanno vutato democraticamente pe n'assemblea costituente addò p''e Maoisti so' chiuvute seggie 'a veverone, ô cuntrario 'e ogne previsiona 'e ll'osservature occidentale.
Hanno vinciuto 'e vutazzione pure ll'autonomiste d''o sud ca cumbatteno, cu 'e sciopere e cu 'e scuppette, p''e deritte d''e Madhesi ca campeno dint'ê chiane ricche meridiunale addò stanno quase sulo lloro. Quaccheduno ha chiammato 'e Madhesi a fà nu boicottaggio ma ll'è juto a chillo servizzio pe tutta 'a gente ca è juta a vutà.
Prachanda, 'a fera, ha purtato chille ca stanno cu isso pe dint'â guerra e mò 'e porta verzo 'a pace, dint'a na democrazzia ca scrivarrà na custituzziona nova nova, scancellanno 'a munarchia e 'e privileggie ca tene, spartenno 'a terra 'e n'ata manera e cercanno 'e mantené 'e giarrettelle cu 'e duje vicine putente, India e Cina.
'A gente è stata chiammata a vutà e ll'ha dato tutta 'a fiducia. 'A fiducia lle venarrà levata si 'e prumesse d''e Maoiste nun addeventarranno rialtà.

'A Cina nquina

2008-04-15T14:18:00.006+02:00

'A primma paggina 'e ogge ncopp'a BBCnews mette n'articulo ca scrama: "'A Cina nquina cchiù 'e tutte quante ll'ate".
'A nutizzia fosse ca a stà a sentere na ricerca 'e ll'Università d''a California, 'a Cina ha passato 'e State Aunite a emissione 'e CO2, pure si nun se sape pricisamente quanno stu fatto è succieso.
Ma però già 'o sapevemo...
Na frase nce vò mettere ll'anzia: "ammeno ca 'a Cina nun cagna terra terra 'e politeche soje pe ll'energia, 'a criscenza d'emissione 'e gas serra sarrà assaje cchiù gruosso d''e ntacche a ll'emissione fatte d''e nazzione ricche suggette ô protocollo 'e Kyoto."
Ma però già 'o sapevemo...
Nce sta na suluzziona sulamente, dice nu tale super-recercatore Max Auffhammer: "nu trasferimento majateco 'e tecnologgie e recchezze d''e Paise Occidentale."

...mmm...?!?

Ma nun songo propeto 'e Paise Occidentale ca, tenenno recchezze e tecnologgie a zuffunne, hanno nquinato nzi a mò cchiù d''a Cina?
Nunn'è ll'Australia ca, accuoncio â pupulazziona soja, nquina ogge diece vote 'e cchiù d''a Cina?
Nun simmo nuje ca avimmo tagliato 'e fureste noste, nquinato 'e sciumme nuoste, ntussecato 'e turrene nuoste, ammancate 'e pisce 'e mare nuoste, arruvinato 'a biodiversità nosta? Nun simmo nuje ca jammo cammenanno cu 'e mascherine antismog e murimmo 'e canchero e cirrosi epatica? Tecnologgie e recchezze so' sacrosante, pe carità, nisciuno s''e vò tené.
Ma 'a suluzziona nunn'è forze dint'a nu cagnamiento majateco d''a manera 'e campà d''a sucietà medio-ricca? Quaccheduno ha maje sentuto parlà 'e sviluppo ca se po alleggerì?
Quanno 'a fernesceno 'e nce vennere 'e miracule d''a tecnologgia, un'euro â buttigliella?
'A tecnologgia nun fa miracule.
'E suluzzione songo sempe dint'ê scelte puliteche e 'e puliteche d''a Cina p''a natura stanno facenno fetecchia comme hanno fatto fetecchia 'e noste. E pe 'e stessi raggione.

Care Cinese,
cu tutto 'o core ve dammo 'e tecnologgie noste e 'a manera 'e campà nosta. E 'e buscie noste e 'o secreto pe nce campà buono: dà a ll'ate 'a colpa d''e crisi ca ve truvarrate cu ll'economia, 'a sucietà, 'a cultura e 'a natura.
Veditavenne buono!

Organisme Geneticamente Mudificate

2008-04-14T11:41:00.005+02:00

'A distribbuzziona 'e cultivazzione OGM p''o munno

OGM so' ll'Organisme Geneticamente Mudificate, vò dicere organisme addó 'o sistema genetico naturale è stato stravisato pe mezzo 'e tecniche 'e ngignieria.

Diceno ca se ponno ausà ll'OGM pe curà 'a gente, pe cultivà cchiù meglio 'a terra, p'arresolvere 'o prubblema d''a famme pe tutt''o munno.

Pe mò sicuro è sulamente 'o rischio 'e ntussecazziona genetica ca succede quanno se spanneno 'e polline stravisate dint'a ll'aria e vanno a sfruculià 'a mazzarella 'a turrene e piante naturale, addó se capisce 'a malaparata pe ll'ecosistema naturale e nun se sape adoppo che pò succedere. 'O fatto 'e ll'OGM comme a nu remmedio p''a famma pe dint'ô munno è mmece na sturiella scritta d''e multinazzionale ca teneno 'a pruprietà d''e semmente OGM e 'e venneno. 'A famme p''o munno nun nce sta pecché manca 'o magnà ma pecché 'e rennete e 'e risorze pe producere nun so' spartute correttamente, e accusì 'e gente d''o sud d''o munno addeventeno sempe cchiù puverielle e nunn'arriveno a s'accattà 'o magnà.

D''o giurnale Carta d''o 14 'e marzo 2008.

'O Curdinamento europeo d''e cultivature 'e terra [Cpe] e 'o Curdinamento 'e ll'organizzazzione 'e cultivature e allevature [Coag] hanno chiammato a tutte quante pe fà na muratoria europea ncopp'a tutte 'e cultivazzione geneticamente stravisate 'a chist'anno a jì annanze. Dint'â chiammata sta scritto:

«Ll'Aunione europea mò adda piglià na dicisione chiara. Mmiezo a chille ca cresceno 'e piante e chille ca ll'accatteno, 'a parte cchiù grossa in Europa so' cuntrarie a ausà ll'OGM pe cultivà e pe magnà. Ll'OGM songo ausate d''e grosse aziende multinazzionale pe cagnà 'e semmente dint'a na proprietà privata e jì 'nculo â suvranità d''o magnà d''e gente e d''e cummunità 'e campagna pe tutt''o munno. Sempe cchiù scienziate diceno ca ll'organisme stravisate songo nu dammaggio p''a salute e p''a natura».

Bush 'o sapeva!

2008-04-13T11:07:00.010+02:00

Lieggete ll'articulo sano sano ncopp'a ABC News, 11 aprile, 2008 (in inglese).

'O Presidente Bush, pe ntramente a n'intervista esclusiva a ABC News ô viernadì passato, ha ditto ca 'o sapeva ca 'e mammasantissima d''a sicurezza nazzionale eveno parlato e s'ereno mise d'accordo ncopp'ê pampuglie 'e comme 'a Central Intelligence Agency (CIA) avesse avuto 'a nterrogà 'a chille ca ereno suspette 'e al Qaeda.

"Embè, avimmo deciso 'e zumpà 'o fuosso pe dà prutezziona â gente d'America. -ha ditto Bush- E certo ca 'o sapevo ca 'a squadra nosta p''a sicurezza nazzionale s'erano ncuntrate ncopp'a sta quistione. E je aggio ditto ca jeva buono".

'A discussione ntra capurione ncopp'a sti "tecniche pe nterrogà cchiù meglio" jeveno accussì dint'â scazetta ca pe cierte 'nterrogatorie s'era fatta quase na coreografia, nzi a dicere quanti vote 'e guardie d''a CIA putevano fà na cosa mmece ca n'ata.

Sti mammasantissima avesseno sottoscritto comme 'a CIA avesse avuto 'a nterrogà 'a chille ca ereno suspette 'e al Qaeda, si ll'avesseno avuto piglià a pacchere, lle vuttà nfaccia ô muro, 'e fà stà senz'e durmì o fà abbedé ca ll'affucaveno, 'o fatto ca chiammeno waterboarding.

Nun stammo faticanno buono!

2008-04-12T14:33:00.005+02:00

Videte 'o vidio

Educazziona pe na cultura 'e pace.
Quaccheduno penza ca dipenne d''a scola, quaccheduno d''a famiglia, ate scaricheno 'a culata ncuoll'ô Bambeniello. Pe paricchie so' sulamente parole. S'accunciarrà 'o carro ncopp'â via quanno 'a jammo a capì ca na cultura 'e pace depenne 'a tutte quante, 'a tutte quante nuje. Mprimmese 'a chille ca danno ll'asempio ê giuvane: geniture, maistre, prufessore, dive. Certamente, propeto chilli VIP d''o munno d''o spettacolo ca 'e giuvane piglieno comme a asempio. Chille passeno paricchie ore ô juorno cu 'e guagliune e lle conteno 'e nu munno favezo ca però a tutte 'e guagliune lle pare overo. 'E guagliune sempe 'e cchiù vulesseno chillo munno llà, s''o sonneno 'a notte, vonno fà tal'e quàle.

Me permetto 'e dicere ca nun stammo faticanno buono!
Simmo tutte quante crisciute a botta 'e sparatorie e gente accisa pe dint'â televisiona, vendette m''o-veco-je, vidioggioche addó se sciarma sulamente, 'e buone contro ê cattive, 'e forte contro ê debbule, 'e russe contro ê nire, cumpetizzione esaggerate pe tutt''e cuolle 'e baccalà d''a vita nosta. Chillo ca sta a ll'ata parte nun s'adda rispettà né cumpiatì, se cuffeja, se dà ncuollo a parole, a mazzate, se lassa annudo senza simpatia né umanità, adda murì e basta! Conme succede dint'ô pluripremiato vidioclip "Girlfriend" d''a bella Avril Lavigne, chella ca ll'adolescente 'a teneno comme 'a na riggina, addò fa abbedé na capuzzella 'e niente ca fa 'a guappa tre contr'a uno senz'e nce ridere 'a coppa, e lle danno 'o premio p''o "Meglio Vidio Canadese", pecché chisto è 'o videoclip cchiù cliccato 'e sempe ncopp'a Youtube.
Me pigliasseno pure pe nu scemo ca fa sulo morale, a me chillo vidioclip me pare na chiazzata 'e vaiasse cuntraria a ll'intelliggenza e a ll'educazziona!!!

'A vuó na Coca Cola? Grazzie no!

2008-04-11T17:35:00.009+02:00

Videte 'o vidio

'Eva 'a succedere na bona jurnata ca se jeva a parlà d''a Coca Cola.
'O simbolo d''o made in USA sta passanno nu sacco 'e guaje in India. 'E cumunità ca diceno che no ô sfruttamento esaggerato d''e surgente d'acqua pe bere pe mettere 'mbutteglia 'e vippete d''a multinazzionale d'Atlanta hanno accummenciato na campagna ca dint'a poco tiempo s'è spasa pe tutto 'o Paese, arrivanno pure a fà nzerrà uno d''e stabbelimente cchiù mpurtante.

'O muvemiento indiano contro 'a Coca Cola è addeventato na cosa bella 'e sustanza addó stanno mmiezo centinare 'e migliare 'e gente. In India, 'o 70 pe ciento d''a pupulazziona campa cultivanno 'a terra e picciò tene besuogno d'acqua assaje. Ê cumunità ca stanno 'e casa vicino ê stabbelimente addó se regneno 'e butteglie d''a multinazzionale chiano chiano dint'a poche dicine d'anne ll'hanno ntussecato 'o territorio, e nu poco â vota chiste se so' truvate ca nun teneno cchiù acqua bastante pe mmezo d''e grosse quantità d'acqua pe bere ca se ne vanno pe fà 'e vippete. Tutte sti fatte so' state na mazzata 'ncapa 'a primma cosa pe 'e cumunità cchiù debbule: pupulazzione indiggene, femmene, gente terra terra, cafune ca campeno cu na sputazzella 'e terra o cultivanno 'a terra 'e ll'ate, tutta gente ca ha patuto 'a perdenzia d''e mezze 'e sustentamento tradizziunale e d''a certezza 'e magnà.
Ll'ammancamento d''e riserve d'acqua d''o puosto ha vuttato dint'a fetenzia cumunità sane sane.

E nunn'è fernuta! Diceno ca 'a Coca-cola, ê cuntadine ca stanno vicino 'e stabbilimente nc'ha despenzato remmasuglie tuosseche comme si fosseno fertilizzante. Mò chello ca succedarrà a chille ca campeno faccia e faccia cu 'e remmasuglie tuosseche nun se pò sapé, 'e tutte manere Coca-cola sicuro ha ntussecato 'o turreno e ll'acqua 'a sotto e 'a coppa 'o turreno, e ha vennuto vippete cu cose tuosseche 'a dinto. Doppo ca 'o CSE (Centre for science and environment) nc'ha fatto nu studio 'a coppa, 'o 7 'e dicembre d''o 2004 'a Corte Suprema 'e ll'India ha obbrecato 'a multinazzionale a mettere ncopp'a ogne confezziona n'etichetta cu na scritta 'e periculo pe chi cunzuma.

'A Coca Cola è addeventata pe tutto 'o munno n'asempio 'e malaggestiona d''e risorze, e ha fatto vedè ca nun rispetta 'e criterie 'e spunsabbeletà verzo 'a sucietà e 'a natura, causanno miseria, ntussecamiente e malatie.

Venite a marcià cu nuje!

2008-04-09T22:43:00.005+02:00

Pubbreco 'a lettera apierta d''o poeta tibbetano Tenzin Tsundue. Mmito tutte quante 'e blogger a fà 'a stessa cosa.

Amice mieje

E' arrivato 'o mumento pe me 'e turnà ô Tibet. L'urdema vota ca nce so' juto ô 1997 - doppo ca m'aggio lauriato - fuje arrestato d''e guardie cinese; m'hanno vattuto, nterrogato e m' hanno lassato dijuno, e quann'è stato m'hanno cacciato d''o Tibet doppo ca so' stato nzerrato areto 'e cancielle pe tre mise primma a Lhasa e pò a Ngari. Chella vota nce so' juto a pede ô Tibet, sul'je, passanno 'e muntagne 'e ll'Himalaya adoppo ca ero partuto d''o Ladakh.

Doppo unnice anne turnarraggio ô Tibet, a pede pure sta vota. Senz'e addimannà 'o premmesso turnarraggio â casa mia. Pecchè m'avesse 'a preoccupà d''e carte d''o reggime culuniale cinese, ca nunn'ha sulamente accupato 'o Tibet ma ll'ha miso pure sotto a nu reggime militare e fa campà 'a gente nosta sott'â tirannia e 'a cinquant'anne 'a mazzuleja buono buono tutte 'e juorne ?

'O 2008 p''o muvimiento tibbetano è na grossa opportunità 'e sbruvuglià 'e ngiustizzie ca 'e Tibbetane se stanno tenenno ncuollo propeto ô mumento ca 'a Cina se vò fà addunà d''e giurnaliste 'e tutto 'o munno.

Me metto pur'je mmiezo â marcia "pe turnà â casa" ca partarrà 'a Dharamsala â via d''o Tibet, e vene organizzata d''o "Muvimiento 'e ll'Arrevuoto d''a Gente d''o Tibet", na fatica fatta tutte nzieme cinche grosse Organizzazzione Fora Guvierno tibbetane: 'O Cungresso d'e Giuvene Tibbetane, 'a Società d''e Femmene Tibbetane, 'o Muvimiento Tibbetano Gu-Chu_Sum (na società 'e ex-priggiuniere tibbetane), 'o Partito Democratico Tibbetano, e 'e Studiente p''a Libbertà d''o Tibet, India.

'A marcia accummencia 'o 10 'e Marzo 2008, 'a Dharamsala, 'a capitale d''e Tibbetane desterrate, attraversarrà Delhi pe piglià adoppo 'a via d''o Tibet. Cammenanno seje mise, vulimmo arrivà ô cunfine cu 'o Tibet propeto ô mumento ca s'arapeno ll''Olimpiade 'e Pechino 2008 ...

Lieggete 'a lettera sana sana ncopp'a Articolo 21

Penzave ca 'e sapive a ll'Italiane?

2008-04-09T10:48:00.008+02:00

Videte 'o vidio

ACEA spa è na municipalizzata, ca vo dicere n'impresa a participazziona pubbreca ca 'o 51 pe ciento appartiene ô Cumune 'e Roma. ACEA pe primma cosa avesse 'a garantì 'o deritto a ll'acqua d''a gente 'e Roma, mmece preferisce 'e costruì ncenneriture e fà puliteche 'e privatizzazziona 'e ll'acqua dint'ê paise d''o sud d''o munno. Cierte diceno privatizzazziona servaggia ma 'a verità 'a privatizzazziona 'e ll'acqua è sempe e sulo servaggia!

Chi ha liggiuto sulo quaccosa d''e prubbleme suciale ca succedeno addó stanno scarze a acqua avarrà sentuto 'e parlà 'e ll'impresa franzesa SUEZ, sicondo capurione mundiale d''e servizie 'e ll'acqua. 'A diece anne 'a SUEZ controlla ll'8,6% 'e ACEA. 'A politica 'e SUEZ tene sulo n'obbiettivo: fà addeventà pe tutto 'o munno ll'acqua na mercanzia comme a tutte quante ll'ate. Cu 'e fatte!

Sulo ca senz'acqua nun se campa nemmanco tre juorne e SUEZ va nianno ll'acqua a miliune 'e gente pe tutto 'o munno. ACEA sta nianno 'o deritto a ll'acqua in Armenia, Perù e Honduras, addò 'a gente d''o puosto d''o 2004 va dicenno che no â privatizzazziona ca chest'azienda italiana a forza lle vò fà. Dint'a sti semmane, ACEA ha tagliato 'o servizio 'e ll'acqua pe bere a tutte ll'honduregne cchiù puverielle, chilli ca nunn'hanno truvato 'e sorde pe pagà duje bullette una areto a n'ata, suggerennole 'e accattà butteglie d'acqua minerale Frasassi, mbuttigliata â via d''e Marche, sempre d'ACEA.

'A privatizzazziona 'e ll'acqua nun se po' accettà. Addó è, è!

L'acqua è nu deritto e no na cosa ca s'accatta e se venne.

Se vulesseno overamente dicere comme stanno 'e cose...

2008-04-08T11:54:00.011+02:00

Videte 'o vidio (in francese)

Ajere aggio visto Kiosque, nu bello programma ca trase dint'â scazzetta d''e cose d''a puliteca e vene trasmesso na vota â semmana ncopp'ô canale franzese TV5. Stu programma 'o fanno vedé 'a matina sotto miezojuorno, na cosa semprice ca fa paura: cierte giurnaliste furastiere cummenteno 'e nutizzie d''a semmana cu ll'esperienze differente d''e prufessione lloro. Ajere 'e giurnaliste veneveno d''a Grecia, Russia, Romania, Tunisia e State Aunite. 'O muderatore era, chiaramente, franzese. Senz'e s'appiccecà e senz'e fà sparate ca nun fernesceno cchiù, dint'a nu stile overamente français, 'o muderatore franzese e 'e giurnaliste furastiere hanno chiacchierato, mmiezo a ati cose, 'e chello ca succede ô Zimbabwe, ca sti juorne se ne sente tanto 'e parlà senza ca diceno niente. Mmece sti quatto giurnaliste, chiacchieranno cu civiltà e senz'e azziccà parole grosse una areto a n'ata, hanno sbrevugnato assaje buono 'a situazziona 'nfaccia a nu pubblico 'e femmene 'e casa e studiente 'nvacanza: 'o Zimbabwe, ex culonia vretannica dint'ô core 'e ll'Afreca d''o sud, fuje triatro fa paricchie anne 'e n'esproprio viulento 'e terre ca jette 'nculo ê latifunniste janche, quatto 'e lloro ma chine 'e sorde, e facette 'o bene d''e cchiù puverielle mmiezo 'e gente nire. 'O grand'ommo 'e stu casino ca succedette fuje Robert Mugabe ca 'a tanno tene 'mmano 'o putere e nunn'o vò lassà manco mò ca ha perzo 'e vutazzione e 'o sanno tutte quante.

Stammo parlanno 'e nu Paese addò 'a cuscienza d''a democrazzia è ô principio e 'o deritto nunn'è 'o stesso pe tutte quante. 'A verità pure addu nuje addò 'a democrazzia è na zoccola vecchia 'o deritto nunn'è 'o stesso pe tutte quante.

S'ha fatto viecchio, Mugabe, ma però rummane uno assaje canusciuto. Cattolico, assaje mparato, militarista, omofobo, è cunziderato "perzona a nun nc'avé a che fà" e nunn'o fanno trasì dinto a ll'Auniona Europea e dint'ê State Aunite ma però ll'hanno dato na laurea honoris causa â Scozia e ll'hanno annummenato Cavaliere 'e ll'Ordine 'e ll'Impero Vretannico!

Paricchie gente ca capisceno diceno ca nce sta assaje rischio 'e na guerra civile.

'A trasmissiona se po' vedè senza pagà ncopp'a internet: kiosque. (in francese)

'O mare, nu blog e nu cuppino

2008-04-07T09:47:00.008+02:00

Ogne matina me vene nu penziero 'ncapa: ch'aggio dicere ogge annanze 'a chille cinche ca leggeno stu blog? Aggio 'a parlà d''e criature viulentate e muzzate mane e cosce ô Darfur o d''a guerra ca mò va a accumencià n'ata vota dint'ô Sahara Occidentale? D''e deritte niate ê Madhesi d''o Nepal o 'e chille ca danno ncuollo ê cristiane vietnamite? D''o mazzulià 'a sanghe mmiezo 'e spiagge d''e Maldive chille ca nun so' d'accordo cu 'o guvierno o d''e paisane Maya ca so' 15 anne ca tenteno ll'autoguvierno? Che senzo tene a smerdià n'ingiustizzia e essere custretto a te stà zitto ncopp'a ati mille? Stutà chella lampada fetente dint'â stanza mia 'o mumento ca nun me serve quanno saccio ca miliarde 'e luce ancora cchiù fetente stanno appicciate e nun serveno a niente? Che senzo tene, m'addimanno ogne juorno, cercà 'e svacantà 'o mare cu nu cuppino 'e niente? Me vene 'e m'addimannà: che vò dicere overamente cultura 'e pace?

Ogne matina je sule annanze ô schermo me dongo duje risposte. Cultura 'e pace 'a primma cosa è educazziona! S'educà a se stesse ogne juorno a fà 'e cose 'e na manera bona pe nuje e pure pe tutte quante ll'ate miliarde 'e uommene d''o pianeta. 'O fà, senz'e fà cose esaggerate e senz'e cercà scuse, dint'ê limmete date d''a società ca tenimmo. 'A siconda risposta me veneva ajere, pe ttramente ca facevemo na discussiona cierte 'e nuje, tutte cittadine attive: cultura 'e pace è fà nu testimonio! Dicere no, tutte 'e juorne, ô sciupio 'e ll'acqua e â cundanna a morte. Alluccà tutte 'e journe ca nuje dicimmo no a tutte chello ca 'a cuscienza nun nce fà dicere che sì. Cultivà 'a cuscienza cu 'o canoscere e cu 'o fà. Fà 'o testimonio cu 'e parole e cu 'e fatte ca nu munno differente se pò fà. Oilloco 'o senzo 'e sta fatica, cultivà a cultura 'e pace ca ognuno 'e nuje tene adinto comme fosse na piantarella delicata: acqua e ammore tutte 'e juorne.

Allora, onestamente parlanno, nun me ne fotte 'e quanta ngiustizzie nunn'arrivo a scrivere. 'E tutte manere stu blog 'e quatte sorde rummane, pe me stesso e pe chi tene 'a vuluntà 'e nce stà, nu machina pe fà cultura 'e pace, piccerella sì, ma 'o sujo 'o fà e a me me piace assaje.

Duje cunte ncopp'ê cammelle

2008-04-06T15:56:00.008+02:00

Fa nu poco 'e tiempo, pe dint'â rezza jeva giranno stu cunto sfizziuso ca parla d''a differenza ntra na cultura 'e solidarietà e na cultura 'e sfruttamento, e nunn'ave besuogno d''o cummentà.

Nce steva na vota n'avvucato ca passava pe mmiezo 'o deserto cu na bella machina. Passanno pe dint'a n'oasi vedette tre uommene allerta ca chiagneveno. Accussì fermaje 'a machina e addimannaje: che prubblema tenite? Chilli rispunnetteno: 'O pate nuosto è muorto 'a poco e nuje 'o vulevemo bene assaje. Embè -dicette ll'avvucato- sicuramente ha fatto nu lasceto. Forze ve pozzo aiutà ma m'avit'a pavà! 'E tre uommene rispunnetteno: Sì, 'a verità ha lassato cierti cammelle. E dint'ô lasceto ha lassato a mità 'e tutte cose ô figlio cchiù gruosso, 1/3 ô sicondo e 1/6 ô cchiù piccerillo. A nuje 'a spartizziona fatta accussì sta buono ma però nce sta nu prubblema: 'o pate nuosto ha lassato 17 cammelle e nuje sapimmo ca 17 è nu nummero ca nun se po' spartere. Nuje, 'e cammelle, 'e vulimme bene, nunn'e putimme fà piezze piezze.

Ll'avvocato nce penzaje nu poco e pò dicette: Facimmo accussì. Vuje me date a me 5 cammelle accussì ne tenite 12. 12 se po' spartere a 2, a 3 e a 6, e ve pigliate 6, 4 e 2 cammelle ognuno 'e vuje. E accussì facetteno. L'avvocato attaccaje 'e cinche sfurtunate cammelle vicino â machina, e ll'urdema cosa ca se vedette fuje na nuvula 'e povere grossa, ca accumigliava 'o sole d''a sera.

Nce steva na vota nu mullah ca jeva â Mecca ncopp'a nu cammello. Passanno pe dint'a n'oasi vedette tre uommene allerta ca chiagneveno. Accussì fermaje 'o cammello e addimannaje: che prubblemo tenite? Chilli rispunnetteno: 'O pate nuosto è muorto 'a poco e nuje 'o vulevemo bene assaje. Embè -dicette ‘o mullah- sicuramente pur’isso ve vuleva assaje bene e manco p''o dicere v'ha lassato quaccosa! 'E tre uommene rispunnetteno: Sì, 'a verità ha lassato cierte cammelle. E dint'ô lasceto ha lassato a mità 'e tutte cose ô figlio cchiù gruosso, 1/3 ô sicondo e 1/6 ô cchiù piccerillo. A nuje 'a spartizziona fatta accussì sta buono ma però nce sta nu prubblema: 'o pate nuosto ha lassato 17 cammelle e nuje sapimmo ca 17 è nu nummero ca nun se po' spartere. Nuje, 'e cammelle, 'e vulimme bene, nunn'e putimme fà piezze piezze.

'O mullah nce penzaje nu poco e pò dicette: Facimmo accussì. Ve dongo a vuje 'o cammello mio, accussì ne tenete 18. Ma chille nce rumanetteno: No, nun può fà chesto, tu pure staje facenno na cosa mpurtante! 'O mullah dicette 'a copp'a mana: guagliu', pigliateve 'o cammello e jammo annanze. 18 se pò spartere a 2 e 'o figlio cchiù gruosso ave 9 cammelle, se pò spartere a 3 e 'o sicondo figlio ave 6 cammelle, po' se pò spartere a 9 e ll'urdemo figlio ave 2 cammelle: nu totale ‘e 9 + 6 + 2 = 17 cammelle. Nu cammello rummanette là, sul'isso: 'o cammello d''o mullah. 'O mullah dicette: Site cuntente accussì? Buono, allora, m''o putite dà 'o cammello mio?

'E tre uommene, chine 'e devuzziona, pure senza 'e capì che era succieso, nce detteno areto 'o cammello. 'O mullah 'e facette na benedizziona e sagliette ncopp'ô cammello sujo, e ll'urdema cosa ca se vedette fuje na nuvula 'e povere grossa, ca accumigliava 'o sole d''a sera.

Congo RD, 'o mostro criato d''o Belgio

2008-04-05T14:38:00.014+02:00

Pubbreco sta lettera ca m'ha mannato Katia Rossi, cooperante dint'â Repubblica Democratica d''o Congo (Congo RD).

Cia' a Bruno e a tutte quante.
Stongo ô CONGO RD, dint'a nu villaggio sperduto ô Kasai Occidentale. Aggio dato n'uocchio â mappa cu tutte 'e guerre d''o munno, forze nun sapite ca ccà nce sta ancora 'a guerra... pe dicere cchiù meglio, 'a guerriglia. Dint'â reggione 'e levante, chella cchiù ricca, pure si oramaje 'o Congo è na miniera 'e minerale prezziuse pe tutte parte. Â fine 'e gennaio hanno firmato n'accordo 'e pace ntra 'o guvierno e 'e capurione 'e cierte gruppe ca fanno 'a lotta. Â basa 'e tutte cose so' quistione 'e sorde, comme sempe è. Ccà nce se mette pure 'a vicinanza cu 'o Ruanda ca joca na parte funnamentale. Stu paese ha fatto 'o sujo cu uommene e mezze pe fà fà 'o presidente a Kabila padre, se murmulea ca pò ll'hanno fatto accidere e mò nfocheno 'a guerriglia. 'O figlio aduttivo, Joseph Kabila, ca pare ca è tanzaniano, venuto a doppo ô pate, nun tene rispetto 'e "ll'accorde pigliate". Pare ca teneno a che fà cu 'a cessiona 'e na parte d''o Congo ô Ruanda. Chiaramente zone 'e miniere...

'A Repubblica Democratica d''o Congo, ex Zaire, è uno d''e State cchiù gruosse e sfurtunate 'e ll'Afreca. Addeventato culonia doppo â Cunferenza 'e Berlino d''o 1885, 'o Congo fuje dichiarato proprietà privata d''o Re d''o Belgio Leopoldo II. Ll'indiggene aveveno 'a arricettà caucciù p''o bene d''o Re, e n'aveveno 'a arricettà paricchio, pecché nce steva sempre cchiù dimanna pe fà 'e gomme d''e machine. Chesta pruduzziona facette 'a furtuna 'e Leopoldo e 'e ll'erede suoje ma però a faticà cu lloro era peggio 'e ll'inferno. 'E punizzione addò cojo cojo e 'e mane muzzate pe mparà 'a gente (a uno se mozza 'a mano e diece se so' mparate) ereno na cosa 'e tutte 'e juorne.
Ntra 'o 1885 e 'o 1908, e mercenarie ca faticaveno p''o Re d''o Belgio accedetteno ntra 5 e 15 miliune 'e Congolese (pe fà nu paravone, facite 'o cunto ca dint'ô maciello d''a Primma Guerra Mundiale muretteno 18 miliune 'e perzone).
'O prucesso d'indipendenza accummenciato cu Patrice Émery Lumumba dint'a ll'anne '50 fuje purtato annanze chiaramente â manera soja d''o Belgio, ca s'arritiraje d''o Congo lassanno nu Paese gruosso quant'è meza Europa, multietnico, cu na società sciarmata e n'economia sciarmata ancora cchiù peggio, mmano ê multinazzionale e senza manco nu franfellicco ca ne capesse quaccosa 'e amministrazziona e puliteca.
Quanno Lumumba cercaje ll'ajuto 'e ll'Unione Sovietica pe truvà na suluzziona ê prubbleme cchiù gruosse a dint'ô Paese, 'e guvierne d''e State Aunite e d''o Belgio decidetteno d''o spezzà 'e cosce. Fuje arrestato d''o culunnello Mobutu, ordinato d''o menisto 'e ll'estero d''o Belgio, e fuje cunzignato ê ribbelle ca primma 'o torturajeno e pò 'o 'ccedetteno. 'O cuorpo venette sciugliuto dint'a ll'aceto.
Mobutu annummenaje 'o Paese Zaire e 'o mettette 'a sotto a nu riggime dittatoriale filo-occidentale nzi 'o 1997, quando fuje vuttato pe ll'aria d''o ribbelle Laurent-Désiré Kabila, ca po' fuje pur'isso acciso ô 2001. Doppo venette 'o figlio Joseph Kabila ca ô 2006 è stato cunfermato n'ata vota â fà 'o Presidente d''o Paese cu 'e primme vutazzione democratiche d''a storia d''o Congo.
D''o 1997 ô 2003 'o Congo RD è stato triato 'e duje guerre addó se so' mise mmiezo 8 nazzione africane e so' state accise cchiù 'e 5 miliune 'e perzone, pe bona parte civile (pe fà nu paravone, facite 'o cunto ca dint'ô maciello d''o Vietnam muretteno 2 miliune 'e perzone). Mò nce stanno guerre cchiù piccerelle ca se tireno annanze ô Kivu, a ll'Ituri e ô Katanga, e nisciuno se ne fotte.

'A mappa fa vedè 'a spartizziona d''o Paese dint'a aree cuntrullate d''e differente milizzie.

Quaccheduno sape addó sta ll'Abkhazia?

2008-04-04T12:32:00.009+02:00

Canoscere e capì buono songo 'a primma cosa pe puté judecà.

Ll'Abkhazia è nu stato 'e ll'Europa de facto indipendente.

Accà sta 'a traduzziona d''a lettera ca 'o Presidente d''a Repubblica 'e ll'Abkhazia, Sergei Bagapsh, ha mannato ô Segretario Generale d''a NATO, Jaap de Hoop Scheffer, 'o journo primma d''o summit NATO 'e Bucarest, 2-4 aprile 2008. (lieggete 'a lettera origginale pubbrecata 'a UNPO)

Spettabbele Sig. Jaap de Hoop Scheffer,
'O vertice 'e Bucarest, c'adda decidere ncopp'â quistione si fà trasì o no membre nuove dint'â NATO, pò crià prubbleme overamente ô Caucaso. Pe mantené pace e stabbelità dint'â reggione nosta e p'arreducere paura e tenzione, è ancora cchiù nicissario a cunziderà 'a rialtà 'e mò e ll'opinione 'e tutte 'e gente nteressate.

Stammo assaje preoccupate p''o fatto ca ncopp'a nu sfondo 'e instabbelità puliteca e 'e guerre ca nun so' fernute, cierti membre 'e ll'Organizzazziona, specialmente parlanno 'a Georgia, ancora penzeno ca 'a NATO è 'a forza ca pò truvà na suluzziona p''e guerre in Abkhazia e Ossezia d''o Sud. Ll'Abkhazia cchiù 'e na vota è stata data ncuollo d''a Georgia e grazzie a stu fatto tenimmo raggione a penzà â Georgia comme a nu puosto adonne ponno venì pruvucazzione militare e pretese 'e cose ca nun ll'attoccheno.

Ll'accanuscimiento a vienatenne d''e Nazzione Aunite d''e cunfine d''a Georgia comme ereno ê tiempe 'e ll'ex Aunione Sovietica aveva accanusciuto acopp''a mana tanti viulazzione d''e deritte umane e d''a puliteca 'e Stalin ca vuleva tené dint'ê saettelle 'a gente 'e ll'Abkhazia. E nunn'è fernuta! 'A Repubblica Democratica d''a Georgia manco era nata e era stata accanusciuta d''e Nazzione Aunite, e già 'o 14 'e austo d''o 1992 ll'esercito d''o sujo 'eva accummenciato na guerra 'e pazze in Abkhazia, arruvinanno gente pacifica e sfravecanno 'e munumente d''a cultura e d''a storia abkhaza. 'A guerra georgiano-abkaza ha nchiantato 'e relazzione ntra Abkhazia e Georgia e nun nce putimmo fà niente.

Songo quase 15 anne ca ll'Abkhazia sta sviluppanno nu sistema puliteco democratico d''o sujo, n'economia 'e mercato, nu sistema 'e legge, tribbunale indipendente, na società civile ca porta rispetto ê deritte umane accussì comme songo 'e standard internazzionale. 'E cose ca nce nteresseno a nuje, a dinto e a fora d''o Paese nuosto, nun teneno niente a che vedé cu chelle ca nteresseno â Georgia.

Ll'Abkhazia 'e mò è nu stato ca se sta sviluppanno 'e na manera ca se pò mantené. Ll'Abkhazia tene 'a capacità 'e fà nfi a ll'urdemo 'e duvere suoje, pò fà 'a parte d''a jonta ô Caucaso. Adopp'a tutte sti fatte, facimmo appello a Vuje pe nun fà n'ata vota 'e stesse errore ca già so' state fatte ô tiempo passato. Quanno jate pe piglià na decisiona si fà trasì o no 'a Georgia dint'â NATO, Ve facimmo 'a preghiera 'e tené cunziderazziona d''o parere 'e ll'Abkhazia.
Cu rispetto

PRESIDENTE S. BAGAPSH

Quaccheduno sape addò sta 'o Myanmar?

2008-04-03T13:00:00.008+02:00

Videte 'o vidio

Se chiammava Birmania o Burma, mò se chiamma Myanmar pecché ll'ha ditto 'a jonta militare ca cummanna d''o 1988. 'A jonta ha scritto n'ata custituzziona p''o Paese, tutta nova, ca ll'osservature indipendente ll'hanno chiammata "nu teatrino". Se farrà ampresso nu referendum pe addimannà â gente d''a piglià pe bona.
Cercanno 'e capì nu poco cchiù meglio 'a situazziona aggio truvato duje storie: una è pe se sfizià nu poco, fa ridere e spieca che succede ô Myanmar; ll'ata nun tene niente 'e sfiziuso, nun fa ridere manco nu poco ma pur'essa spieca che succede ô Myanmar.
Adduvinate 'o spasso addó sta.

Primma storia
Tre Burmese fanno discussione ncopp'â razza 'e Adamo e Eva. 'O Burmese crestiano dice ca sicuramente erano Burmese cristiane pecché erano belle assaje. 'O Burmese cinese dice ca sicuramente erano Burmese cinese pecché pure cu na serpe annanze pareva ca 'o fatto nunn'era d''o lloro. 'O Burmese indiano dice ca putevano sulamente essere Burmese indiane pecché nun teneveno casa, nun teneveno panne, nun teneveno denare, se sparteveno na mela a duje, cunsigliate 'a na serpe ca nzisteva a lle dicere ca chillo era 'o Paraviso.
Lieggete tutto 'o piezzo ncopp'a San Oo Aung’s Weblog (in inglese)

Siconda storia
Nu capitano e tre surdate armate e cu 'a divisa ncuollo songo arrivate a Man Yong, nu villaggio vicino a An, e hanno chiammato a tutte chille d''e seje villagge attuorno. Ogne villaggio ha avuto 'a mannà na perzona pe fà n'incontro addò hanno cummunicato ca hanno miso nzieme nu gruppo 'e surdate pe punì a chille ca voteno no 'o referendum. "Vulimme vedè surtanto vute buone pe nuje, o si no 'e villagge e chilli ca nce stanno 'e casa 'a vanno a pavà cara e amara."
Lieggete tutto 'o piezzo ncopp'a Articolo 21 (in italiano)

Italia libbera 'a arme nucleare

2008-04-02T16:04:00.004+02:00

Videte 'o trailer 'e Aviano Italia

In Italia, tutte quante 'o sapeno ma quase nisciuno se ne fotte, nce stanno nuvanta testate nucleare, in viulazziona d''o spireto d''o trattato 'e non-proliferazziona nucleare (NPT) firmato 'a ll'Italia.
Nun songo d''e noste, nun putimmo decidere che n'avimmo da fà. Putimmo sulamente nc''e tené, a lloro, ô buono ca ne vene (nce sta chi se sente cchiù sicuro cu na bomma nucleare areto 'o palazzo...) e ô malamente.

Ncopp'a Carovana di Pace se legge 'o scritto 'e na proposta 'e legge a inizziativa d''a gente pe dichiarà ll'Italia "Zona Libbera 'a Arme Nucleare". 'O 26 'e marzo hanno annunciato ca so' state mise nzieme 'e cinquantamila firme nicessarie pe presentà 'a legge, adoppo a na campagna zitta zitta, purtata annanze 'a gruppe piccerille 'e gente, nfromme ca ha fato defietto 'a participazziona d''e partite comme pure ll'adesiona 'e ll'organizzazzione internazzionale cchiù grosse. Assuciazzione piccerelle, puteche d''o cummercio equo, parrocchie e sindacate cchiù piccerille hanno vuttato annanze ll'inizziativa.

'O 22 dicembre d''o 2005, nu cumitato ‘e cittadine ha presentato ô Tribbunale Civile 'e Pordenone n'atto 'e citazziona contro ô Guvierno d''e State Aunite, pe fa levà 'e 50 atomiche ca stanno a Aviano.

'O primmo neguzziato p''o doppo-Kyoto

2008-04-01T16:52:00.005+02:00

Cummunicato 'e stampa, Lunnedi 31 'e Marzo d''o 2008, ore 11:03

Clima: s'arape a Bangkok 'o primmo neguzziato p''o doppo-Kyoto.

S'è araputa stammatina a Bangkok 'a primma vutata 'e neguzziate ufficiale pe truvà n'accordo ncopp'ô doppo-Kyoto, p'arrivà a ammancà ll'emissione 'e gas serra. "'O munno va truvanno na suluzziona bona p''a sacca e ca nun mantene sulo Natale e Santo Stefano", ha ditto 'o segretario generale 'e ll'ONA (Organizzazziona d''e Nazzione Aunite) Ban Ki-Moon dint'a na mmasciata pe vidio ê mille delegate d''e 163 paise firmatarie d''a cummenziona quadro ncopp'ê cambiamente d''o clima (CNUCC). Ll'obbiettivo 'e sti cinche juorne 'e neguzziate è chillo d''a fernì 'e jì uno a levante e n'ato a punente comme succedette â Cunferenza 'e Bali ô dicembre passato ca jette a fernì sottencoppa. Se vulesseno jittà 'e base pe n'ato protocollo cchiù nuovo, buono pe tutte quante ma no cchiù tarde 'e ll'anno che vene. 'O Protocollo 'e Kyoto, firmato sulamente 'a 37 paise (nun ll'hanno firmato manco 'e State Aunite), scade ô 2012. Cu tutto chesto nunn'arriveno a se fà na zenniata ncopp'a n'idea ca mettesse mmiezo pure ll'economie cchiù grosse ca mò stanno nascenno comme 'a Cina e ll'India.

Tengo duje parole 'a dicere.

Primmo: venimmo a sapè ca 'a Cunferenza 'e Bali d''o dicembre 2007 è juta a fernì sottencoppa, cu tutta 'a palla d''o burdello 'e ll'accordo in extremis e cu tutte 'e surrise 'e tutte 'e gente d''a puliteca nosta.

Sicondo: nunn'aggio visto 'e giurnale 'e se sbattere troppo assaje pe sta nutizzia. Forze nunn'è na cosa ca nce nteressa.

E chi 'o sape si nc''o diciarranno 'o stesso comme è juta a fernì.

'A guerra 'e ll'acqua a Cochabamba

2008-03-31T12:06:00.003+02:00

Videte 'o film ncopp'â guerra 'e ll'acqua a Cochabamba (in Italiano)

Abbasta ca faje na ricerca semprice ncopp'a google 'cochabamba acqua' e truove tutto chello ca vuò sapè ncopp'a sta storia ca nun se pò credere. Tutte ll'attiviste ambientaliste d''o munno 'a canosceno.
Pigliateve scuorno tutte chille ca teneno 'e stabbilimente e tutte 'e gente d''a puliteca ca vulesseno privatizzà ll'acqua, addò state pe tutto 'o munno!
Ll'acqua è 'a cosa cchiù nicissaria pe campà. Senz'acqua se more dint'a tre juorne.
Ll'acqua è nu deritto funnamentale 'e tutte ll’uommene comme a ll'aria e â libbertà: nisciuno pò dicere ca è 'a soja.

Si 'e guerre d''o seculo passato so' state cumbattute p''o petrolio, chelle 'e mò se cumbattarranno pe ll'acqua
Ismail Serageldin, vicepresidente d''a Banca Mondiale

Pe cena educazziona â pace

2008-03-30T23:45:00.004+02:00

Ajere pur'je, comme a meliune 'e ati perzone, aggio participato ô fatto 'e ll'Earth Hour, ca ll'ha fatto 'o WWF. Aggio stutato 'e luce ca putevo stutà e avimmo cenato cu duje cannele appicciate, je, na EVS Italiana atea, nu studente tetesco prutestante e nu ricercatore Pakistano mussulmano.

Che ll'avimmo fatto a fà 'e stutà tre lampadine?

Nc''o simmo addimannato e avimmo parlato d''a mpurtanza 'e sta mossa simbolica ca nun crea nu sparagno 'e risorse ca vò dicere quaccosa ma crea cuscienza d''o besuogno 'e sparagnà risorse e taglià d''o 30% ll'emissione 'e gas serra 'a mò ô 2020. Frasa doppo frasa, ntra nu bicchiere 'e russo e na scelletella 'e pullo, ntra astemie e veggetariane, avimmo parlato 'e ll'immoralità 'e cierti cose ca accattammo, comme 'e banane e a ciucculata, ca 'e cultiveno 'e schiave ô sud d''o munno. Avimmo parlato d''o cuttone pakistano e d''o cummercio equo in Europa, d''o deritto d''a fatica dint'ê Paise in via di sviluppo, d''a catena d''o cummercio â manera libberista e 'e chill'urdemo aniello d''a catena ch'è 'a scelta 'e chi va a accattà, addò tutte quante tenimmo 'o canzo 'e fà quaccosa.

Venevemo 'a culture e manere 'e campà differente ma avimmo saputo truvà parole soccie pe parlà d''a società addò campammo e addò mettimmo pure 'o nuosto p''a cagnà ogne juorno cu 'e scelte ca facimmo. Era sulo na cena ntra cumpagne e s'è cagnata dinto a n'occasiona assaje bella pe fà crescere na cultura 'e pace.

Che vò dicere autodeterminazziona?

2008-03-29T12:03:00.007+01:00

Faccio 'a traduzziona 'e nu testo ncopp'ô deritto 'e autodeterminazziona pigliato d''o sitio web d''a UNPO. Nzi a mò 'o dicere che no a stu deritto ha fatto scuppià dicine 'e guerre pe tutto 'o munno.

Mprimmese, 'o deritto 'e autodeterminazziona è 'o deritto ca na pupulazziona tene 'e se scegliere essa stessa 'e che morte adda murì. Specialmente stu principio lassa a ogne pupulazziona 'e se scegliere 'o status puliteco ca lle piace e 'int'a quala direzziona vò sviluppà ll'economia soja, 'a cultura e a società. Quanno se mette mana 'a stu deritto pò jì a fernì 'e tutte 'e manere, a fà nu stato propeto indipendente nzi a addeventà na cosa sola cu nu Stato ca nce sta già. 'A cosa cchiù mpurtante è tené 'o deritto 'e scegliere: pure si pò jì a fernì 'e na manera ca nun nce cummene 'o deritto 'e scegliere nc'adda stà. Mmece, praticamente parlanno, 'e guvierne spisso cagneno faccia annanze 'e dimanne concrete 'e na pupulazziona a siconda e comme pò jì a fernì. Succede accussì ca na dimanna 'e autonomia culturale pò tené 'o canzo 'e essere accanusciata 'a nu Stato nfromme ca na pretesa 'e indipendenza nc''a votteno 'nfaccia ampresso ampresso. Ma però 'o deritto 'e autodeterminazziona è accanusciuto d''o deritto internazzionale comme a nu deritto a fà senza 'e se fà 'o prubblema 'e comme pò jì a fernì. E' nu deritto ca nunn'appartene ê State e nemmanco ê guvierne: appartene ê pupulazzione.

Quaccheduno sape addò sta 'o Nepal?

2008-03-28T17:21:00.014+01:00

Videte 'o documentario 'A rialtà d''o Nepal (in inglese, cu accento Nepalese !o!)

'O Nepal è nu Paese bello assaje, chino 'e storia e 'e cultura, addò mommò è fernuto n'arrevuoto ideologgico e buono accumencia nu tozzatozza interetnico. Nu bell'articulo ncopp'a BBCNEWS nce dà n'asempio 'e comme 'a prutezziona d''a natura, 'a pace e 'e nteresse private ê vote songo una cosa. Faccio 'o pussibbele p''o cuntà senza fà nu papiello.

'O Nepal è a patria d''e muntagne cchiù avete d''o munno e tene na varietà esaggerata 'e animale e piante, ma tutta 'a fatica fatta pe tené sti bisciù buono astipate se nguaia appresso 'e tarantelle d''a puliteca. 'O Funno Nazzionale p''a Prutezziona d''a Natura è stato nzi a ll'anno passato ntitulato a n'ex re, Mahendra, e teneva comme presidente 'o principe ereditario Paras nfromme ca 'o pate, re Gyanendra, faceva 'o santo prutettore ncopp'a tutto.
Na ndaggina fatta ha cunchiuso ca pe paricchio tiempo 'a famiglia riala d''o Nepal ha spiso maniate 'e sorde d''o Funno pe quistione personale lloro, viagge a ll'estero, belli feste e cuntrolle ô spitale p''a Riggina Komal dint'a cliniche inglese. 'A ndaggina ll'hanno fatta sana sana ex ribbelle maoiste ca mò stanno 'o guvierno e teneno 'o cuntrollo d''o Funno, ma non se ponno dà na fiducia totale. 'A relazziona ncopp'ô stato d''o Funno cade duje semmane primma d''a vutazziona pe ll'assemblea costituzzionala ca avess'a scancellà pe sempe 'a munarchia, ô guvierno 'a 240 anne.
Si 'a storia fosse overa, fosse n'asempio d''e sgarre fatte d''a famiglia riala, ca so ghiute a fernì dint'a diece anne 'e guerra ideologgica ô Nepal addò se conta ca so' muorte nzi a 12-13.000 perzone, d''o 1996 ô 2006.

Lieggete 'o dossier BIPPI ncopp'a guerra civile in Nepal (in inglese)

PMC. Mamma d''o Carmine!!!

2008-03-27T15:08:00.005+01:00

MB (metto sulo ll'iniziale pe sicurezza) m'ha mannato nu papiello ncopp'â rialtà 'e ll'Iraq ô 2008, accussì comme ll'avimmo vuluta nuje gente 'e ll'occidente.

Ll'Italia se n'è ghiuta maje a ll'Iraq? (in italiano)

Quanno se n'jetteno 'e surdate riolare e venetteno 'e Private Military Companies.

Se parla 'e mercenarie e contractors, 'e quanno se mettettero mmiezo 'e cumpagnie private (PMC, Private Military Companies) e 'e comme chesti ccà se porteno 'e na manera "suoccia 'a chello ca fanno 'e gente d''a puliteca" d''e State ammescate cu 'a guerra.

Se parla 'e cuntratte, se diceno nomme e nummere, fatte scanusciute 'a tutte chille opinioniste d''a «missiona 'e pace».

Se parla 'e Barbara Contini, guvernatore p''a Coalition Provisional Authority, (CPA, 'a coalizziona ca fà ll'accupazziona), d''a pruvincia 'e Dhi Qar, ô sud 'e ll'Iraq.

Se parla "'e uommene armate ca nun teneno niente 'a vedé cu nisciuno cumando, civile e militare, ca fanno 'e padrune senza tené prubbleme dint'a nu paese fatto 'a piezze d''a guerra".

Nu papiello fatto cu criterio overo, leggitavillo.

Pe capì nu poco cchiù meglio 'e quale cultura stammo parlanno nce metto pure 'o link ô spot d''a StartSicurezza srl, una d''e meglie ngenzie italiane 'e security privata, e n'ato link a Arcoiris TV pe vedé na battuta 'e caccia a ll'ommo in Iraq fatta 'a na maniata 'e "contractors" americane d''a AEGIS, na ngenzia privata superspecializzata.

Succede pe dint''o munno

2008-03-26T15:59:00.004+01:00

Mohamed Bacar, Presidente eletto 'e Anjouan

Nu pucherillo 'e nutizzie d''o munno ca 'e giurnale nun nce fanno sapé.

Na cosa comme 450 surdate 'e ll'esercito comoriano ajutate 'a 1.500 surdate 'e ll'Unione Africana hanno accupato 'o martedì ch'è passato ll'isola 'e Anjouan, 'a siconda 'e ll'isole Comore, e stanno mettenno 'e mane addò vonno lloro. Cierte ca teneveno p''o guvierno separatista so' state accise, cierte ate ufficiale so' state mise 'ngalera. 'O presidente eletto 'e Anjouan, ‘o colonnello Mohamed Bacar, nun ll'arriveno a truvà. 'A rielezziona soja ô giugno d''o 2007 è stata dichiarata foralegge d''o guvierno federale 'e ll'isole Comore.

'O parlamiento russo, 'a Duma, ha appruvato 'a coppa 'a mana na risoluzziona ca addimanna 'o guvierno 'e accanoscere ll'indipendenza 'e ll'Abkhazia e 'e ll'Ossetia d''o Sud, duje pruvincie filorusse de facto indipendente. 'A Duma evidenzia 'o rispetto p''a suvranità d''a Georgia, dicenno c''a dichiarazziona unilaterale d'indipendenza d''o Kosovo ha cagnato 'e carte 'ntavula. Dint'ô raggiunamento d''a Duma russa nce trase pure 'a Transnistria, reggiona filorussa d''a Moldavia, pur’essa de facto indipendente.

N'atu membro 'e ll'etnia Degar (chille ca chiammeno Montagnards) è ghiuto a ll'ato munno dint'ê galere vietnamite addò steva priggiuniero pe mmezo d''a religgiona soja. 'E Degar, ex alliate 'e ll'USA ê tiempe disgraziate d''o Vietnam, songo sucutate d''o guvierno centrale pe mmezo 'e ll'identità culturale lloro ca fa una cosa cu 'a terra addò campeno e cu 'a religgiona ca credeno, tutte cose ca 'e fanno desiderà cchiù autonomia.

Taiwan, n’atu stato de facto indipendente ma senza nisciuno accanuscimiento internazzionale, ha scigliuto cu nu referendum 'e nun trasì pe mò dint'a ll'Organizzazziona d''e Nazzione Aunite, sciglienno 'e ghì mano e mano (economicamente) e no 'e se dà mazzate (militarmente) cu 'a Cina.

Aje 'a essere tu 'o cagnamiento ca cirche ô munno

2008-03-26T15:35:00.013+01:00

Pe me educazziona â cultura d''a pace vò dicere na cosa grossa: jì vedenno comme ognuno 'e nuje pò fà stu munno nu puosto meglio pe tutte quante; 'e che manera ognuno 'e nuje po' fa 'a differenza.

Nunn'è nicessario a fà ll'estremiste, nun s’adda essere perfette pecché perfette nun se po’ maje essere!
Ma però è nicissario 'e luttà pe fà tutte cose meglio, mprimmese jenno canuscenno 'e fatte d''o munno. 'A cosa cchiù mpurtanta è tenè cuscienza ca ogne vota ca facimmo n'azziona jammo sfruculianno nu munno sano. Quanno sapimmo chesto, putimme sempe fà 'a meglia scelta jenno vedenno buono 'e cose ca penzammo e 'e nicissità ca tenimmo.

O meglio nemico d''a pace è chillo ca lassa a ll'ate 'a fatica d''a fà.

"Aje 'a essere tu 'o cagnamiento ca cirche ô munno" (Mahatma Gandhi)

Bracciodiferro, ommo 'e pace

2008-03-25T11:26:00.004+01:00

Lieggete ll'articulo Carna amara 'e Daniela Condorelli (in italiano)

Simmo tutte quante spunsabbele, cu chello ca nuje sceglimmo e ca nuje cunsumammo, 'e tutte cose chello ca succede pe tutto 'o munno. Liggenno n'articulo 'e Repubblica me vene a mente nu fatto c'ave a che fà cu Pasqua: 'o cunzumo 'e carna.

'A carna, specialmente 'a carna rossa, è nu magnà 'e lusso si penzammo a tutte 'e risorse ca nce vonno p''a fà: nu muojo cultivato a grano pruduce cinche vote cchiù proteine 'e nu muojo destinato 'a pruduzziona 'e carna; nu muojo cultivato a spinace pruduce 26 vote cchiù proteine.
Pe tutto 'o munno nce stanno 1,3 miliarde 'e vacche, na mandria ca nun fernesce cchiù ca occupa, direttamente o indirettamente, 'o 24% d''a faccia d''a terra e cunzuma na quantità 'e grano ca abbastasse a dà a magnà a centinare 'e miliune 'e perzone.

S'è studiato ca nce vonno 1000 gramme 'e proteine veggetale p'arrivà a avè 60 gramme 'e proteine animale. Ca nu chilo 'e manzo "veve" 3.200 litre d'acqua. Ca nce vonno 22 gramme 'e petrolio pe pruducere nu chilo 'e farina contr'a 193 gramme pe producere nu chilo 'e carna.
Ll'animale, p''e dà a magnà, aje 'a sprecà nu cuofano d'acqua e energia; tutte 'e vacche ca nce stanno s'agliotteno acqua e energia a tunnellate. E tutto chesto pe dà a magnà sulo ô 20% d''a gente d''o pianeta. Chillo 20% ca se ne vede buono d''o 80% d''e risorse 'e tutto 'o munno.

Si tutto chesto nunn'abbastasse a cunzumà nu poco 'e carna rossa mancante, avimm'a penzà ca na bella parte d''o granulino dato a magnà ê vacche vène accattata a poco e niente d''e Paise addò 'a famma accide 'a gente. 'E criature d''e Paise puverielle nun teneno grano abbastante pecché nuje nc'avimmo 'a magnà 'a fella 'e carna.
Bracciodiferro se magnava 'e spinace. Si facessemo comme a isso 'o munno fosse nu poco cchiù meglio.

'A primma lezziona ca m'aggio mparato

2008-03-25T10:16:00.006+01:00

'O papa, primmo mmiezo a tutte 'e prievete d''a chiesa cattolica romana e capo spirituale facimmo 'e nu meliardo 'e cristiane, chiamma a tutte quante pe truvà «suluzzione ca pruteggeno ô bene e â pace» addò stanno guerre pe tutto 'o pianeta, nce mettenno a dinto 'o Darfur e 'a Somalia, 'o «Medioriente marturiato», 'a Terra Santa, ll'Iraq, 'o Libbano, «e pe fernì 'o Tibet».
Ll'infallibilità papale stabbelita d''o Cuncilio Vaticano I tene mente sulo â duttrina religgiosa e no â vita accussì comme 'a tirammo 'a campà tutte 'e juorne.
Comme jenno 'a vedé, 'o papa s'è sbagliato.
S'è scurdato dint'ô discorso sujo 'o Caucaso, Haiti, 'o Yemen, 'o Sahara Occidentale, 'o delta d''o Niger, 'o Nepal, 'o Mindanao e tutte ll'ati puoste d''o munno, cchiù 'e 70, addò perzone accideno ati perzone pe tené 'o deritto 'e guvernà.
O forze nun s'è sbagliato 'o papa, se sbagliano giurnale e televisione ca nc'arricordano 'e cose d''o munno sulo quanno nce stamme cu 'a capa a dinto. Ma forze ca nun stammo tutte quante cu 'a capa a dint'a tutte 'e guerre d''o munno?
No?
Chi venne 'e mine antiuomo ô Marocco pe tenè 'e Saharawi luntane d''e giacimente 'e fusfate?
Chi aiutaje e aiuta ê guvierne filippine a tené sotto 'o pacchero 'a gente d''o Mindanao?
Chi se ne vede buono 'e chelli belli risorse Niggeriane lassanno sulo mullechelle â puvertà estrema d''a gente 'e llà abbascio?
Chi manna surdate e ammasciature ô Medio Oriente p'accummiglià 'e purcarie 'e chelli mmieze dittature ca chiammammo regne e emirati?
Chi fà accorde commerciale meliardarie cu guvierne ca nun sanno 'e deritte 'e ll'ommo addò stanno 'e casa?
Chi se nventa sinonime cchiù dilicate d''a parola guerra pe jì a sciarmà tutte cose e pò a fravecà n'ata vota?

Educazziona â cultura d''a pace, primma lezziona: simmo tutte quante spunsabbele, cu chello ca nuje sceglimmo e ca nuje cunsumammo, 'e tutte cose chello ca succede pe tutto 'o munno globalizzato.
Tutte quante vò dicere ognuno 'e nuje!

Che Caucaso vaje dicenno?

2008-03-23T16:21:00.003+01:00

Liggenno n' articulo 'e Repubblica m''è venuto a mente ca ô Caucaso nce stanno cierti guerre separatiste ca nce ll'avimmo propeto scurdate: Cecenia, Inguscezia, Daghestan, Ossetia, Abkhazia, Nagorno-Karabakh, e forze pure nu paro 'e cchiù ca je nun saccio.

Guerre assaje scurdate. 'A verità chi ne vulesse dà cunto e ammacaro dicere cose ca nun so' chelle ca dice 'o guvierno, chille rischia 'a vita. Oilloco pecché 'e chesti pupulazzione sfurtunate se sape poco e niente, si no ca songo Russe (pure si 'e russo nun teneno né 'a lengua, né 'a religgiona, né 'a storia, né 'a faccia, né ncopp'a tutte cose manco 'e sentimiente).

Sfido a tutte quante a sapè 'e na manera semprice che è succieso lloco st'urdeme duje anne. Chille ca tene nutizzie fernute avence nu surriso e nu grazzie d''a parte meja e d''o munno d''e blog e d''o penzamiento libbero.

Meraglia 'e scuncierto ô valore militare

2008-03-21T17:05:00.005+01:00

Chi s'arricorda 'e Franco Piperno e 'e Potere Operaio ('E faticature ô guvierno)? Chi s'arricorda 'e ll’anne '70 in Italia, quanno maggistrate, guardie e gente d''a puliteca mureveno accise sott'ê mazzate date 'a filosofe, rivoluzzionarie e peones d''a lotta armata?
'E primme 'e chiammajemo "serviture d''o Stato".
'E siconde 'e chiammajemo "terruriste".
Fuje na guerra piccerella e 'o Stato 'a vincette e 'a scrivette ncopp'ê libbre ca nuje ogge leggimmo.
Nun vulesse ca quaccheduno mmiezo 'e 5 ca me leggeno pensa ca je dongo raggione ô terrurismo. Mmece je sto d''a capa ô pede cu 'o principio scritto dint'a chillo bello articulo 11 d''a Costituzziona Italiana: "Ll'Italia schifa 'a guerra comme manera pe fà purcarie contr'â libbertà 'e ll'ata gente e comme strumento p'arresolvere 'e cunflitte internazzionale".
Me metto 'a coppa, pe me è fatto buono sulo a mità, je 'o cagnasse mommò cu : "'O popolo italiano schifa 'e tutte 'e manere viulenza e sfreggie comme strumiente pe mettere mano a tutte 'e tarantelle, comme so' so'", senza 'e nce parlà 'a coppa!

Franco Piperno, ntervistato d''a televisione, ha ditto: "'A morale tene tanti facce. Nce stanno perzone ca vanno a jittà bomme ncopp'a na città, e songo annumenate grand'uommene, e perzone ca spareno ncopp'a nu bersaglio priciso, e songo annumenate criminale. 'A siconda, sulo pecché chill'ate hanno perzo 'a 'guerra".
Quacche giurnalista s'ha fatto na risata ncopp'a sti parole.

Enrico Cialdini fuje nu grand'ommo 'e ll'indipendenza italiana. Ô mumento ca se faceva 'a guerra contr'ê brigante, isse fuje spunsabbele 'e punizzione addò cojo cojo e esecuzzione 'e massa 'e pupulazzione sane sane ô sud Italia. Ma sti cose so' scumparute d''a storia.
William Tecumseh Sherman fuje nu grand'ommo d''a guerra 'e secessiona americana. Ô mumento ca se faceva 'a guerra contr'a ll’indiane fuje spunsabbele 'e punizzione addò cojo cojo e esecuzzione 'e massa 'e pupulazzione sane sane mmiez'ê pianure americane. Ma sti cose so' scumparute d''a storia.

Gengis Khan, Napulione e Cesare fujeno grand'uommene o assassine? 'E quanta muorte 'nnucente fujeno spunsabbele? 'E quanta muorte 'nnucente fujeno spunsabbele Stalin e Mao? 'E quanta muorte 'nnucente fujeno spunsabbele Roosevelt e Churchill?
'E capibanda ca stanno ogge, ll'alliate mpurtante e 'e nemice d''o tiempo nuosto, so' grand'uommene o assassine? P''o sapè avimmo sulo a aspettà ca uno vence e n'ato perde. Chillo ca vence scrivarrà 'a storia e nc''o diciarrà.

Not In My Back Yard

2008-03-20T14:15:00.004+01:00

Ncopp'a ll'editoriale 'e Carta d''o 14 'e marzo 2008, nce steva stu piezzo ccà.

Nun ce sta forze na manera cchiù peggio 'e chesta p'affruntà 'e quistione mise mmiezo d''e muvemiente 'e cittadine nate st'urdeme anne in Italia: ne fà sulo nummere.
'O Sole24Ore ogge dice chello c'hanno truvato facenno nu studio ncopp'ê case 'e «sindrome Nimby», ll'etichetta ca 'e giurnale hanno azzeccato ê muvemiente 'e gente ca fanno 'o burdello contro a fraveche ca so' «pubbreche» sulo pe fà vedè. A stà a sentere 'o studio, nce stanno in Italia 193 fraveche «bloccate» p''e pruteste d''e pupulazzione d''o puosto. Manco p''o dicere, p''o giurnale d''a Confindustria tutto chesto nun se pò accettà. Centrale elettriche, inceneritore, monnezaje e rigassificature songo 'e pruggette ca fanno fà cchiù burdello. 'E nummere sulo lloro fanno capì na cosa pe n'ata: nun diceno niente d''a qualità d''e pruggette, d''o pecché d''e critache, d''a storia d''e puoste e d''e muvemiente. Tutto coso è ammescato dint'a na cifra, nu nummero ca se filtra e se nterpetra «cu ll'economia». Mmece, assaje spisso, areto a nu «no» nce sta nu «sì», a fattapposta energetiche differente, a na gestione d''a munnezza fatta cu cchiù criterio o a ati manere 'e se spustà, cose ca 'a puliteca 'e mò e 'a manera ca 'e giurnale mpurtante nce contano 'o paese votteno, quanno va buono, dinto a paggine 'e passatiempo addò se parla 'e «muvemiente» ca non se sapeno nterpetrà e nun se ponno leggittimà.
Comme si 'a «sindrome» purtasse a dicere cose ca nun teneno capa nè coda, strunzate ecologgiste o miragge 'e democrazzia energetica.

Parafrasanno 'o raggiunamento, arreducere a nummere e slogan tante muvemiente, 'e vote viulente 'e vote no, ca danno nfaccia ê guvierne vo dicere cancellà 'e raggione d''a gente sotto a giudizzie etiche o pulitiche fatte 'e pressa e senza sapé. Oilloco ca chille so' terruriste, chill'ate assassine, là ncoppo nun canosceno 'a storia, là abbascio nun teneno mente â geografia, e a nisciuno nce ne fotte d''o pecché uno piglia n'arma e accide a a n'ato.

M'arricordo na cosa ca aggio sentuto tre vote dint'a vita, ditta cu parole nu poco differente ma no troppo differente: "Chille so' perzone gnurante, cafune ca vatteno 'e mugliere e alliscieno 'e figlie malamente."
'A primma vota fuje nu guaglione d''a Russia, parlanno 'e ll'indipendentiste Cecene.
'A siconda vota fuje na guagliona d''a Turchia, parlanno d''e nazzionaliste Kurde.
'A terza vota fuje nu guaglione 'e ll'India, parlanno d''e separatiste Kashmiri.

Penzo ca nce sta sempe e sulo tuorto quanno se parla 'e bombe e carrarmate, ma a me me pare 'e capì ca quase sempe chi spara contro 'o guvierno 'o fà pe dicere "Nimby", Not In My Back Yard: fora d''a casa mia! Si 'e guvierne stesseno a sentere 'e parole forze nisciuno tenesse besuogno 'e sparà...

A Leopardi 'o Premio Nobel p''a pace

2008-03-19T17:36:00.007+01:00

Stammatina m'aggio pigliato quacche minuto pe chattà cu n'amica d''a Lituania. Na guagliona giovane, capace e priparata, sicuro una d''e meglie perzone ca aggio ncuntrato sti urdeme anne.
Oilloco na parte ‘e chillo ca c’avimmo ditto.

je - che pienze d''o BIPPIblog?
essa - me piace, sule ca sti cose me fanno overo paura
je - paura?
essa - mhm
nun sapesse propio comme putesse aiutà pe cagnà quaccosa
è comme avé ll'uocchie nzerrate
nc'adda stà n'ata manera 'e fà quaccosa ca va buono p''a gente semprice comm'a me
je - 'a cosa cchiù nicissaria, chest’è pe tutte quante, è cagna nuje stesse dint'â capa nosta
nzerrà ll'uocchie nunn'è 'a strada bona
si ognuno 'e nuje cagnasse pure sule nu poco, 'o munno fosse nu puosto assaje meglio
essa - 'o saccio, ma a stà assettata dinto a na bella casa chiena 'e cummudità e dicere ca stongo 'mpenziero pe chello ca veco 'e succedere è comm'a tenè ll'uocchie nzerrate

Veco sta manera 'e fà nu poco pe tutte parte. 'E guagliune se senteno piccerille, comme si nun fosseno capace 'e se mettere mmiezo ê quistione grosse d''o munno ca è na giungla malamente e senza legge e tanno meglio a s'accupà 'e cose cchiù vicine e facile, 'e sport, d''o cellulare e d''o Grande Fratello. Pure 'a democrazia, ca è attivismo e participazziona, addiventa sulamente espressione 'e voto senza cuscienza e senza genio, e so' cuntente chill'uommene assaje mpurtante ca nun teneno niente 'a dicere.
Pecché a se ribbellà nun serve a niente e niente cagnarrà, meglio a campà senza penziere cu ll'uocchie nzerrate, comme diceno 'e Giacomo Leopardi quann’era giuvinotto.
Leopardi, nce mparano â scola, è nu pessimista appucundruto e picciò tutte 'e guagliune 'o teneno 'ncanna.

Mmece Leopardi, 'o signor Leopardi, a 38 anne, poco primma 'e murì e chino 'e cuscienza, capette ca 'a società er'a essere fatta nova e cchiù solidale, no cu lezzione astratte 'e morale o religgione, ma pecché nc'amma fà capace ca sule 'a resistenza tutte nzieme contr’ô nemico naturale, 'o male, pò fà ll'uommene overamente uommene, e fà 'a vita na cosa chiena 'e dignità.
Stu Leopardi, 'o signor Leopardi, 'o vestesse cu 'o 'mbrellino 'e BIPPI p''o vedè annanze a tutto a dicere no â guerra, ô sopruso, ê cose fatte a camorra, â viulenza, ê turture, a ll'ingiustizzia, â xenofobia, a ll'assimilazziona a forza d''e culture cchiù piccerelle, â distruzziona d''a natura, no ê buscie, ê paure telecomandate, ê besuogne a forza, â gnurantità d''e guvierne.
Stu Leopardi venesse cu me a fà 'o burdello contr'ê megapruggette ca fanno sulo ruvine, contr'a ll'accupazzione militare, contr'ê caste guvernative, contr'ê disfunzione fattapposta.
Stu Leopardi fosse n'attivista p''a pace 'e chilli gruosse.
Addimanno pe Leopardi 'o premio Nobel p''a pace, â memoria!

E ‘o Perù se venne l'amazzonia

2008-03-18T18:21:00.010+01:00

Vaje ô sitio www.aiutalanatura.it/

Accà stanno cierte piezze 'e n'articulo cumparuto ncopp'a Articolo 21 d''o 29 'e gennaio 2008 ca se chiamma "E 'o Perù se venne l'amazzonia". (lieggete ll'articulo sano sano)

'O Presidente d''o Perù Alan García ha annunciato ca vò vennere ê multinazzionale d''o lignamme 8 miliune 'e muoje 'e furesta primaria dint'a ll'Amazzonia. Alan García dice ca sule cu 'a privatizzazziona 'a furesta putarrà producere "ossiggeno, lignamme e fatica facenno buono 'a tutte 'e Peruviane". Ma però pe dicere sta cosa ha avuto 'a jì a Madrid, dint'a madre patria, accussì chiammeno 'a Spagna, addò ha truvato ll'appojo sicuro d''e multinazzionale d''o lignamme. Cheste â fine d''e cunte vedesseno superate 'e limmete stabbelite d''e legge 'e ll'anne '70, ca deveno 'e terre sule 'ncuncessione e no pe venneta, e sule a piezze piccerille, accussì 'o stato puteva dà n'uocchio a comme s'ausaveno e dà nu punto 'e cchiù ô sfruttamento artiggianale d''e risorse d''a furesta amazzonica.
'O pruggetto 'e privatizzazziona 'e ll'Amazzonia peruviana è cuntrastato malamente d''e pupulazzione d''o puosto, cumunità indiggene e cuntadine ca se cunsidereno no sulamente fatte fore, ma pure a risico 'e scumparì dinto a nu mudello industriale 'e sfruttamento d''a furesta comm'a chillo neoliberale vuluto 'a Alan García. Chille ca stanno 'e casa dinto a ll'Amazzonia peruviana hanno sempe campato sfruttanno 'a furesta 'e na manera esaggerata ma sempe apparanno cu periode 'e stop assaje luonghe. Chisto è 'o mudello ca ha astipato nzi a mò 'a furesta primaria levanno ll'occasione pe nu sfruttamento troppo esaggerato comme se fà nu poco a tutte parte a ll'Amazzonia brasiliana.

Liggenno ll'articulo me vene 'ncapa chella ca aggio sempe penzato comme a na premessa a prescindere pe puté arraggiunà: ogne impresa 'e finanza o cummercio grossa assaje - megacuncessione 'e sfruttamento, culosse finanziarie, ipermercate o megacentre cummerciale, infrastrutture gigantesche, megapruggette pe cagnà 'o territorio, - tutte iper, mega, giga, super imprese comme a cheste so' mbrusature pe fà 'o bene d''e gruppe 'e putere cchiù mpurtante addò và a fernì 'a ricchezza vera d''o Paese, 'nculo â gente comm'a nuje, ê nicissità, ô stà buono e ô futuro d''a gente comm'a nuje.

N'Italia ca te fa stà buono dint'ô core

2008-03-17T14:44:00.005+01:00

Guardate 'o meglio piezzo 'e Na verità scommeta, 'e Al Gore.

Guardate n' esempio 'e propaganda contro-ambientalista.

M'ha fatto penzà n'articulo d''o 13 'e marzo ncopp'a Repubblica.

Nu gruppo 'e nazzione, poche ma so' sempe 'e cchiù, stanno facenno na gara ca nun sta scritta a nisciuna parte p'addiventà nu "Paese neutro" parlanno d'emissione 'e anidride carbonica. Na gara contr'a ll'affetto serra ca vene chiammata "Carbon-neutral World Cup" e ca vede pe primme mommò Costarica, Nurvegia, Nova Zelanda e Islanda.
Arrivà â "neutralità" d'emissione 'e anidride carbonica vò dicere apparà ll'emissione 'e gas serra ca se produceno brucianno 'e combustibbile fossile cu quaccosa ca fà pari ncopp'â valanza, comme pò essere na bella furesta.
'E sti juorne Roberto Dobles, Ministro custaricano 'e ll'Ambiente e ll'Energia, dice ca 'o Paese sujo ha vinciuto 'a gara pecché è arrivato a ll'obiettivo 'e essere nu "paese neutro".

Nun nce fa niente si 'o Costarica è stato o nunn'è stato 'o primmo, 'a nutizzia nunn'è chesta. Liggenno me so' venute a mente tutte chille ca diceno ca 'o clima ca cagna nunn'è overo: lobbies industriale, scienziate deviate o accattate, opinioniste gnurante, ministre cape 'e mbrello e nu sacco 'e gente normale, gente ca ha studiato, ca penza ca sta quistiona nunn'è digna d''a tené mente.
Fa nu poco 'e tiempo m'arricordo c'aggio parlato cu nu maestro 'e scola media ca 'o porto rispetto, e me diceva tutto cunvinto ca ll'ommo se piglia 'a cunferenza 'e cagnà 'o clima d''o pianeta quanno cheste so' cose naturale e nc'avimmo sule d'adattà. Chist'ommo avesse 'a faticà a ll'edicola abbascio â sagliuta 'e Salvator Rosa, a Napule, e pò putessemo parlà.

Me vene 'a penzà: si sule in Italia facessemo come dice chella bella leggia 'e nchiantà n'arbero p'ogne criaturo ca nasce, si facessemo ferrovie nu poco meglio (no 'a TAV - Di Pietro! - ma 'e reggionale!) invece 'e spennere tanta sorde a fà autostrade p''e dà a Benettòn, si 'o Parco d''o Vesuvio facesse na maggia e se cagnasse dint'a nu parco overo mmece 'e chillu munnezzaio ca sta lloco (Bassolinoooooo!!!), si se facesse cchiù raccolta differenziata e quacche inceneritore mancante (Bassolinoooooo!!!), cchiù eolico e meno gravone, si 'e piccolo-borghesi accattasseno meno SUV, si astutassemo 'e luce quanno nun ce serveno, si 'a capa d''a gente fosse meno fattemieje... forze pure ll'italia fosse cuntenta 'e fà 'a gara cu 'o Costarica p''a "Carbon-neutral World Cup" mmece 'e se fà 'o core tanto pe ll'eliminazziona 'e ll'Inter ca è sulo furastiere.
'E n'Italia accussì jesse fiero pur'je!

Brindammo! Brindammo!

2008-03-17T09:15:00.003+01:00

Guardate 'o report d''a televisiona cinesa

Tibet. Tutte quante teneno quaccosa 'a dicere e voglio parlà pur'je, però a me me vene 'e dicere tutte cose, pover'a me!

Mprimmese: d''o 1949 a jì annanze 'o Tibet nu poco â vota e afora d'a legge fuje accupato 'a ll'esercito cinese d''e maoiste. 'O risultato 'e chella accupazziona fuje na scia 'e sanghe e dulore, ca doppo cchiù 'e cinquant'anne nun me fa paura d''a chiammà cu na parola sola: 'etnocidio'.

Nummere e fatte (disgraziatamente nun putimmo sapé si songo overo) denunciate d''e muvimiente ca stanno cu 'o Tibet so' chisti ccà:
- cchiù 'e nu milione 'e muorte
- 130.000 sfollate ('a cchiù grossa parte ô Nepal e a ll'India)
- 6.000 munasterie arruvinate
- migliare 'e Tibbetane ncarcerate pe delitte pulitiche
- distruzziona a poco â vota 'e d''e cose naturale ca nce steveno pe mettere fabbriche a tutta forza
- arme e surdate addò vaje vaje
- assimilazziona culturale fatta cu 'a forza
Lieggete: http://www.comunitatibetana.org/it/uno-sguardo-sul-tibet.pdf

Fosse tutte cose overo o pure sulamente na parte, è nu schifo e lle scassasse pur'je tutte 'e vitrine. Ma...
...primma 'e ll'invasiona cinesa, 'o Tibet indipendente era na munarchia teocratica (ogge l'urdemo esempio, accussì me pare, è 'o Vaticano) e steva mmiezo ê Paise cchiù puverielle e arretrate d''o munno, attaccato mane e piede a nu riggime feudale 'e sfruttamento. 'A casta d''e muonace campava ncopp'â fatica d''a gente ca era gnuranta, puverella e faceva na vita sacrificata.
'O Tibet nunn'era, comme dice 'a gente, nu stato pacifico o pacifista, teneva n'esercito (steva nguaiato 'o 1949, ma sempe era n'esercito) e teneva na storia militare ca faceva paura, fatta 'e guerre, accupazzione, mazzate date, mazzate pigliate, trattate e aiutame a dicere.
'A Cina d''a parte soja, comme a ogne putenza coloniale, dice ca ha fatto infrastrutture, spitale, scole, case muderne, e ha dato meglio a campà ê Tibbetane ca mò so' libbere e senza patrone.

A me me piacesse 'e cchiù e campà libbero e puveriello ca essere scamazzato pe nu poco 'e tranquillità. Je però vaco facile, 'o scrivo ncopp'a nu computer e pò me vaco a magnà 'o tiramisù dint'â cucina. Nun saccio quante Tibbetane 'a penseno comme a me. Sicuramente stanno cu me chille ca ogge rischieno 'a vita mmiez'â via a Lhasa.

'O Dalai Lama, premio Nobel p''a pace, capo spirituale d''o Tibet e capo d''o Guverno Tibbetano in esilio, è nu grande filosofo d''a nunviulenza e, 'a verità, na perzona eccezziunale. A leggere uno d''e libbre suoje se fà n' esperienza ca nun t''a scuorde. Paricchie 'e lloro diceno ca 'a manera soja 'e campà e 'a forza ca tene 'e fà propaganda veneno d''e sorde ca lle dà 'a CIA americana.

Epilogo.
Je songo nu sportivo d''a dummeneca, uno 'e chille ca 'o sport 'o vedeno p''a televisione, e je sicuro nun jesse a fa 'a celebbrazziona d''o 'spirito olimpico' â Cina 'e ll'oppressione puliteca e d''e 5.000 cundanne a morte ogne anno, ma nemmanco ô Marocco d''e 2.500 km 'e muro contro ê Saharawi, â Russia d''a guerra cecena, 'e State Aunite 'e Guantanamo e Abu Ghraib, â Birmania, a Cuba, ô Vietnam, ô Sudan, a ll'Uzbekistan, ma manco â Francia d''a leggione ô Chad e d''a privatizzazziona 'e ll'acqua, e forze nemmanco dinto a ll'Italia 'e Bolzaneto e Savignano Irpino pecchè manco addu nuje 'e deritte 'e ll'ommo so' fronne 'e rosa.
Però, si vulimmo dicere, s'je fosse nu sportivo 'e prufessione ca tene sule 10 anne pe vedé c'adda cumbinà cu tutte 'e sacrifice c'ha fatto, e ll'Olimpiade fosseno 'o canzo d''a vita mia, pò essere ca jesse a fà a gara a Pechino e lassasse 'e deritte 'e ll'ommo ê pulitiche ca cundannano e fanno 'a faccia brutta ma pò s'abbaccano ll'uno cu ll'ato e fanno accorde 'e cummercio cantanno "Libiamo! Libiamo!". Brindammo!

Sapè primma 'e parlà

2008-03-16T01:21:00.005+01:00

Quaccheduno m'ha scritto p'addimannà che penzo 'e ll'operazziona 'e pace/guerra (de según como se mire todo depende, cantaveno i Jarabe De Palo) in Iraq e Afghanistan.

Pe primma cosa avite sapé ca pe me ll'Afghanistan e ll'Iraq songo duje poste d''a stessa avventura, pure cu tutte 'e differenze ca nce stanno.

Na vota c'aggio ditto chesto, credo ca 'a meglia risposta è chist'articulo ca ha scritto ncopp'a Reséau Voltaire Michael Schwartz, prufessore â Stony Brook University d''o stato 'e New York, ca fà 'a presentazziona d''a famosa ricerca 'e chella rivista medica americana assaje mpurtante, The Lancet, chella ca parla ncopp'ô nummero d''e muorte in Iraq e spieca chelle ca nuje chiammammo "reole d'ingaggio" d''e surdate americane in Iraq.

S'adda leggere: http://www.voltairenet.org/article150746.html

Ncopp'a chesto quaccheduno m'ha fatto canoscere quacche juorno fa stu film ncopp'a youtube: Nu scandalo americano.

Ncopp'ô blog Alessio in Asia aggio letto mmece stu cummento:

"I feel that if we withdrawl from IRAQ, there might be terror."
wow… if there might be terror… I wonder… what’s going on since “we” invaded Iraq ?

Parlammo e nun ce capimmo

2008-03-14T14:35:00.003+01:00

Vaje 'a paggina 'e wikipedia Lengue parlate in Italia

A sta a sentì nu studio fatto tanno tanno 'a Survival International, ogne mese moreno duje d''e 6.000 lengue materne ca esisteno pe tutto 'o munno. Jenno annanze accussì 'o patrimonio linguistico 'e ll'umanità sarrà a mità p''a fine d''o seculo. P'evità nu scatascio culturale 'e sta manera 'e Nazzione Aunite hanno pruclamato 'o 2008 Anno internazzionale d''e lingue.

'A morte 'e na lengua è nu fenomeno cumplicato, ca tene a che fa cu ll'invasione 'e lengue cchiù grosse, comme a ll'inglese, ll'arabo e 'o spagnuolo, ca dice 'o linguista Michael Krauss, songo «overamente nu gas nervino culturale». Ogge, 'o 96 pe ciento d''a gente d''o munno parla sulo 'o 4 pe ciento d''e lengue.
Praticamente na lengua more quanno more l'urdema perzona c''a parla, ma se tratta sempe 'e na morte annunciata. Na lengua è viva nzi a che nce sta nu cierto nummero (cientomila) 'e perzone ca 'a parleno. Sotto a stu nummero nce sta 'o riseco ca 'a lengua more.
Areto a stu fenomeno nce sta quase sempe n'atteggiamento puliteco sbagliato: 'a prutezziona d''e lengue cchiù piccerelle nun se fa cu 'e cunvegne e 'e parlamiente, ma dannoce nu valore e ausannole. Spagna, Russia, India e Suddafrica songo esempie 'e accanuscimento e prutezziona d''a diversità linguistica. Ô 2001 è stata firmata 'a Dichiarazziona universala ncopp'â diversità culturale, ca tene comme obbiettivo 'e «pruteggere 'o patrimonio linguistico 'e ll'umanità e difennere 'a capacità 'e se fa capì e 'o fatto 'e spannere quante cchiù lengue è pussibbele. S'adda dà forza â diversità linguistica, cu tutto rispetto d''a lengua materna, e s'hannno a nvuglià 'e criature a parlà cchiù lengue 'a quanno so' piccerenielle». Cuntrariamente quasi pe tutte parte truvammo n'idea 'totalitaria' d''o Stato ca ncenzea 'a lengua ufficiale e scamazza 'e lengue materne cchiù piccerelle, spisso trascurate, vottate dint'â schifezza e affucate. Ll'Italia è 'o meglio esempio.

'A scumparsa 'e na lengua nunn'è nu rammaggio 'e teoria ma è nu scatascio d''a sucietà. Ogne lengua tene 'mmocca tutto nu modo 'e penzà ca scumpare si nisciuno 'o dice cchiù. Affucà na lengua porta tenzione suciale ca nun se ponno bloccà pecché generazzione sane sane nun teneno cchiù 'a pussibbelità 'e studià cu prufitto, parlà cu ll'istituzzione, partecipà â vita pubblica e fà parte d''a società civile, pecché le vene vietato d''o fà dint'â lengua soja.
Scamazzà na lengua materna, comme 'a gire e comme 'a vote, mena sempe a nu fenomeno d'esclusione 'e femmene e uommene ca nunn'hanno scegliuto quale lengua hanno a parlà.

Invisible colours of Benetton

2008-03-13T17:33:00.007+01:00

Videte 'a presentazziona
Vaje ncopp'ô sitio d''a campagna The invisible colours of Benetton

'A n'articulo cumparuto n'anno fa ncopp’â Selvas.org:

'O 14 'e frevaro (2007) songo arrivate primma 'e ll'alba e hanno addimannato ê forze d''a natura 'e faticà nzieme a lloro, po’ hanno fatto na cumunità pensanno ê muorte lloro ca "campaveno libbere ncopp’a chelli terre e ca mò songo oggette dint’ê museje e trufeje 'e na cultura ca distrugge chille ca so’ ‘e n’ata manera". 'E Mapuche torneno a accupà chella terra ca vonno areto 'a tant’anne e ca fa parte d''o latifunno d''e Benetton â Patagonia argentina.

Ncopp’a nu sitio Mapuche se legge:

'A cumpagnia italiana Benettòn, chella d’’e panne, e' assaje canusciuta p''a pubblicità soja, criteca nfaccia â società, ca pare ca vò fà chi sa che. Ma 'a cumpagnia, fora d''a casa soja, va pur’essa facenno ‘e pastette soje. Ô sud 'e ll'Argentina Benetton s' ha accattato cchiù 'e tre miliune 'e muoje 'e terra. 'A pupulazziona d''o posto, p''a parte cchiú grossa Mapuche, so’ furzate a lassà 'e terre.

Invasione d''o Ottuciento, vennete 'e stramacchio, riale a premie nobel... Na telenovela suddamericana. Pe nce capì quaccosa abbasta circà nu poco ncopp’a google: "Benetton vs Mapuche". E leggere.
Nu panno d’’a Benetton è bello e nun costa troppo assaje, ma che nce sta areto a chillo cuttone e a chella lana?
Aje voglia 'e scerià, cierti cose nun jesciarranno maje pulite.

Verschärfte Vernehmung

2008-03-12T17:27:00.005+01:00

Lettera 'a ll'America (nu piezzo)

Sabbato, 8 'e marzo 2008

'e David Wright

Ogge è capitato nu fatto brutto overo, ca votta dint'â chiaveca tutto chillo ca chiammammo decenza; nu fatto accussì gruosso ca va a fernì ca nce 'o truvammo dint'a tutte 'e pizze d''a società. Arricurdateve sta data, sabbato, 8 'e marzo 2008: 'e State Aunite d'America hanno appruvato l'uso d''a turtura. Cu 'a firma d''o veto contro ô pruggetto 'e legge d''o Cungresso ca abbulisce 'a turtura, 'o Presidente Bush ha ditto ca 'a turtura se pò fà. 'O Presidente ha fatto na nfamità nfaccia ậ società soja. E stu fatto nc''o ricurdammo.

Vene 'o mumiento ca stu dicere “sì” â viulenza 'e Stato nce tuccarrà a tutte quante. Chiano chiano nu Stato cammurrista nce votta a tutte quante pe ll'aria. Chiaramente 'o Stato nuosto nunn'a chiamma turtura, nce piace 'e cchiù 'e dicere "Tecniche pe nterrogà cchiù meglio".

Sta scritto ncopp' ậ Wikipedia:

Andrew Sullivan, ex redattore d''o giurnale The New Republic, ha ditto ca "ll'interrogatorio tuosto" pare tale e quale ê tecniche ca 'a Gestapo chiammava "Verschärfte Vernehmung", ca pe ll'avè ausate cierte so' gghiute annanze ô tribbunale doppo 'a siconda guerra mundiale e so' state "dichiarate curpevule 'e crimine 'e guerra e cundannate a morte". E nunn'è ca pareno sulo tale e quale, ma 'a parola tetesca "Verschärfte Vernehmung" se pò traducere paro paro cu "interrogatorio tuosto".
'O 1948 nu tribbunale nurveggese ha ditto ncopp'a ll'uso 'e ll'ipotermia 'e stessi parole ca diceno 'e carte 'e Guantanamo. 'A difesa ausata d''e nazziste pe giustificà ll'uso 'e chisti tecniche "pare quase chella 'e l'amministrazziona Bush". Specialmente 'o cuncetto 'e "cumbattente nemico foralegge" è miso mmiezo pe giustificà ll'uso 'e chesti tecniche ncopp'a "ribbelle priggiuniere senza divisa". 'O film d''e bomme a tic tac, ca mò ll'avimmo capito tutte quante ca è nu film, ausato pe dà na giustificazziona loggica â turtura arricorda 'o fatto d''o "Terzo grado" d''a Gestapo. Ma si 'a na parte 'e manere 'e fa ll'interrogatorio d''e nazziste so' state chiammate "turtura", 'O New York Times scrive ca pure 'e manere 'e ll'Alliate a chillu tiempo llà funziunaveno assaje cchiù meglio 'e chelli ausate mò d''e State Aunite.

S'hanno mettere scuorno pe tutt''a vita Obama e 'a Clinton (candidate democratiche ê presidenziale d''o 2008, ndr) ca erano troppo accupate a se fà eleggere pe turnà a Washington e vutà contro â turtura. Stu fatto fa capì comme 'a società nosta ha già accettato 'a forza, 'o dulore e 'o male. Ma si pensammo ca chisto è stato nu sbaglio, guardammo adoppo. John McCain (candidato repubblicano ê presidenziale 2008, ex priggiuniero 'e guerra ô Vietnam addò è stato turturato, ndr) è turnato areto e ha vutato contro ô pruggetto 'e legge. Seje anne turturato d''e cittadine 'e ll'urdemo Paese ca 'e State Aunite hanno accupato e McCain nun s'è mparato niente. Ca fosse pe chello ca fanno o pe chello ca nun fanno, chille ca vonno guidà sta nazziona ê quatte anne ca veneno hanno accumenciato overamente 'e na manera ca nun se crede.

'A generazziona arrubbata

2008-03-11T15:26:00.005+01:00

Videte 'o vidio (in inglese)

Ogne duje e tre se sente 'e parlà d''o primato d''a cultura occidentale c'ha purtato libbertà e democrazzia pe tutt''o munno, vottanno pe ll'aria chiano chiano dittature nzanguegne, ideologgie pigliatutto e imperie d''o male.
Pe fà n'esempio d''a superiorità culturale 'e stu libbero Occidente, 'evvilloco cierte piezze 'e n'articulo pigliato d''o Berliner Zeitung d''o 29 febbraio 2008 ncopp'a chella ca chiammeno 'a 'generazziona arrubbata'.

"Ntra 'o 1910 e 'o 1970 diecemila criature abboriggene fujene pigliate cu 'a forza d''e case lloro p'essere aduttate 'a famiglie "janche", sicondo nu prugramma leggittimato d''o Stato. P''o bene d''e criature, diceno ancora mò na maniata 'e Australiane.
Ô 1997 na ricerca ca se chiammava 'Purtammole a casa' pubblicaje chesti viulazzione d''e deritte umane ca fujeno na cosa esaggerata. Chille ca studieno 'a storia parleno 'e tentato genocidio. Alluntanà 'e criature avesse avuto comme scopo sulamente 'e bloccà 'a trasmissione d''a cultura e d''a lengua 'e l' Abboriggene.
Â fine 'e ll'anne '80 ancora ll'Abboriggene 'e cierte zone 'e ll'Australia rischiaveno 'a vita.
Diece anne so' passate e tanno 'o Primmo Ministro John Howard nun se vulette scusà cu ll'Abboriggene annanze ô Parlamento. Sulamente chille ca è venuto adoppo, Kevin Rudd, ha ditto na primma cosa, istituenno 'a poco 'a "Jurnata Nazzionale d''e Scuse" ca se fà 'a celebbrazziona ô 13 'e febbraio, e s'è scusato cchiù 'e na vota personalmente e pe conto 'e ll'istituzzione. P''e 450.000 Abboriggene australiane ll'essere finalmente ricanusciute tene nu significato gruosse assaje.
No tutte quante però songo assaje cuntente p''e scuse d''o Presidente. Tanno tanno 'o guverno 'a verità nunn'avesse sprecato nemmanco na parola ncopp'ê terre ca s'hanno arrubbate e 'e massacre ca so' succiese. Sempe cchiù Abboriggene vonno pure na cosa 'e sorde pecchè ll'attocca."

'O terrurismo funziona!

2008-03-10T15:43:00.008+01:00

Ê juorne passate avimmo pututo leggere ncopp'ê giurnale d''a minaccia 'e ll'Uighuri, terruriste mussulmane, alliate 'e Al Qaeda, ca putesseno culpì quanno nce stanno ll'Olimpiade. Ammeno accusì se legge dint'ê titule d''e giurnale.

A leggere nu poco cchiù meglio se sgama ca se tratta d''e separatiste d''o Turkestan orientale, accussì 'o chiammeno lloro, ma 'e Cinese se ncanano a sentì stu nomme, pe lloro è 'o Xinjiang.
Se vene a sapè ca stu populo turcofono, mussulmano 'a sempe, ca appartene ê Turcomanne e no ê Cinese, tene na storia antica.
Se vene a sapè ca d''a mità 'e ll'800 nzi â mità d''o '900 'a pruvincia ha cercato paricchie vote ll'indipendenza soja, nzi a essere libberata/accupata 'a ll'Esercito 'e Libberaziona Pupulare cinese, 'o stesso ca libberaje/accupaje 'o Tibet. Quistiona 'e comme 'a vuò vedè!
Dint'ê libbre 'a cinesizzazziona d''o Turkmenistan orientale è canusciuta comme 'a pacifica libberazziona d''o Xinjiang, sule ca chille d''o puosto nun songo tutte quante d'accordo. A jì a vedè dint'â scarzetta d''o prevete, se vene a sapè ca stu populo è stato mazzuliato buono e meglio d''o guverno cinese pe quistione culturale e puliteche, ammeno accusì diceno Amnesty International e Human Rights Watch.
Dalle e dalle, 'e tenzione culturale e sociale fanno fà quistione malamente: 'o 1962 se detteno tante 'e chilli mazzate ca ne facetteno jì 60.000 perzone; 'o 1990 nce fujeno 50 muorte; 'o 1997 s'arrevutaje tutte cose e facetteno pure attentate cu 'a dinamita.

Arreducere tutto chesto a 'mussulmane malamente alliate cu Al Qaeda' è 'o risultato 'e nu giurnalismo 'e niente ca regne paggine 'e Grande Fratello e se sfasteria 'e scrivere quatto righe 'e storia.
Si nun fosseno state minacciate 'e Giuoche Olimpiche ca so' sacre, chi maje avesse sentuto 'e parlà 'e sti fetiente 'e Uighuri e d''o Xinjiang?

Embè, 'o terrurismo funziona.

Scieme sgamate

2008-03-10T12:34:00.006+01:00

Stu vidio è o scuonceco assaje e nun pò essere visto senza 'e se reggistrà

Pe essere scieme nun ce sta bisogno 'e essere surdate e manco 'e essere Americane, e chisti duje scieme d''o vidio nun hanno 'a essere cunsiderate né pecchè surdate, né pecchè Americane. Songo sule duje scieme.

Scieme nce ne stanno a tutte 'e Paise e dint'a tutte 'e categurie. Sicuramente, sulo pe fà n'esempio, nce starrà ô Guatemala nu carrettiere scemo.
Sule ca nu carrettiere d''o Guatemala nun pretenne 'e purtà civiltà e democrazzia p''o munno e si è scemo peggio pe isso, ma sicuramente nun farrà casine assaje gruosse.

Siente che dice 'a CNN (in inglese)

3 Obbiettivo

2008-03-08T19:58:00.005+01:00

Nce putimmo pure fà quatto risate...

'A meglia manera per fà ll'augurie a tutte 'e femmene è parlà d''o terzo Obbiettivo 'e Sviluppo d''o Millennio: ncasà 'a mana cu ll'eguaglianza d''e sesse, cchiù 'e tutte cose levanno 'a miezo 'e diseguaglianze dint'a ll’istruzziona primaria e sicundaria pe tutto 'o munno, meglio primma d''o 2005 e pe tutte 'e scole primma d''o 2015.

'E diseguaglianze 'e sesso songo na cosa ca nun te può sbaglià.
'O 60% d''e 115 miliune 'e criature ca nun vanno a scola so' femmene. 'O tasso 'e gnurantità ntra 'e femmene crisciute ê Paise puverielle è assaje aveto. 'E duje tierze 'e ll'arfabbete d''o munno so' femmene.
'E femmene fanno cchiù ore 'e fatica 'e ll'uommene pe tutto 'o munno ma appareno sule 'o 10% d''o reddito mundiale.
'E femmene tèneno sule 'o 1% d''a terra ca se pò cultivà pe tutto 'o munno.
E pe tutto 'o munno 'e femmene teneno sule 'o 14% d''e pultrone 'e parlamentare e arriveno ô 30% sule dint'a sette Paise.
'Na femmena ncopp'a tre pe tutto 'o munno è vittima dinto'â vita soja 'e viulenza sessuale; 'a mità d''e vittime 'e viulenza sessuale pe tutto 'o munno nun tene manco 16 anne.

L'Obbiettivo 3 nun è fatto 'e parole vacante. Chi se vò fà n'idea 'e comme se pò fà praticamente ll'Obbiettivo 3 pò leggere st'articulo pigliato d''o sitio d''o Dipartimento Federale Svizzero 'e ll'Affare Estere.

Penzà globbale e fà ncopp'ô puosto

2008-03-07T20:46:00.010+01:00

'O Curdinatore Nazzionale 'e YAP Italia, Stefano Varlese, m'ha mannato chist'articulo cumparuto ncopp'a Selvas.org d''o 9 'e dicembre 2007. Parla 'e ll'Ecuador comme a n'esperimento 'e economia regulata, democrazzia partecipativa, redistribuzziona sociale, integrazziona reggionale, sucialismo d''o XXI seculo, e cchiù 'e tutte cose 'e muratoria 'e ll'estrazione petrolifera d''a zona ITT - Ishpingo-Tiputini-Tambococha, dint'ô parco 'e Yasunì. Leggitavillo!
Pubbreco ccà sotto nu piezzo:

"Nunn'è sulo na prova pe pruteggere na reggiona cu na biodiversità ca nun tene paragone ma vò dicere mettere mmiezo nu mudello nuovo ca gira tutt'o cuntrario 'a manera ca l'uommene, nzi a ogge, hanno ausato 'e risorse naturale. Sperimentassemo nu mudello ca nc'abituasse a campà senza 'o petrolio, ca pò essere sarrà 'a nurmalità d''o futuro; avesse ammancà mommò pe tutte 'e danne ca fà â natura. 'A sfida nunn'è sulo chella 'e ll'Ecuador, è 'a sfida 'e tutta ll'umanità."

Ncopp'ô stesso fatto, ma guardanno 'e cose 'e n'ata manera, v'aggio 'a nzignà pure n'articulo cumparuto ncopp'a Andinamedia d''o 27 'e ottobre 2007 e n'ato articulo cumparuto ncopp'a Global Project d''o 12 'e nuvembre 2007.

'O quadro generale d''o prubblema esce fora d''a campagna Salvammo 'o Yasuní ca in Italia ll'ha misa mmiezo ll'assuciazzione Asud.

Jucammo â pace

2008-03-06T23:30:00.006+01:00

Videte 'o video

Quanno ero criaturo me piaceva 'e jucà â guerra. Era nu spasso.

Quanno po' m'aggio fatto gruosso aggio capito, sul'je propetamente senza ll'aiuto 'e nisciuno, ca 'a guerra nunn'è nu juoco e nun nce sta niente a se spassà.

'A cultura d''a pace accummencia cu dicere ca 'a guerra nunn'è nu juoco. Facimmo ca 'e criature fanno a capì chi è ncunia e chi è martiello senza tené pistole e spate pe pazzielle, senza fà chino 'e muorte ncopp'ê videoggioche. Nunn'hanno a jucà a accidere. Â guerra nun nce sta nisciuno spasso. Male se fà e male s'abbusca.

Aggio truvato ncopp'â Réseau Voltaire n'intrevista a Jimmy Massey, ca ha fatto 'o surdato e è turnato d''a guerra. L'articolo è luongo ma però mmito tutte quante a ll'o leggere attentamente. Nunn'è mpurtante cu quale esercito e quala guerra ha fatto Jimmy. Tutte 'e surdate nguerra fanno chello ca ha cuntato isso pecchè 'a guerra nunn'è nu juoco. Male se fà e male s'abbusca.

"Fuje addestrato a fâ tutt''e cose ca diceva 'o presidente senza ciatà (...) e pe purtà ô paese chillo ca isso jeva truvanno senza penzà a Dio e ô diavulo. Ero nu pazzo scatenato pecché m'aggio mparato primma a sparà e po a addimannà, comme a nu malato e no comme a nu surdato 'e mestiere ca adda affruntà sulamente n'atu surdato. Si s'avevano accidere femmene e criature, nuje 'o facevemo."

Ncopp'â na rivista francesa liggette sta frasa: si 'a risposta è 'a guerra, 'a dimanna adda essere sbagliata!

Parlanno d''o Tibet

2008-03-05T13:27:00.024+01:00

Sientete 'a canzona

Voglio cuntà cierti parte ‘e n’articulo ‘e BBC NEWS ca se chiamma: Bjork fa nu gesto p’’o Tibet libbero.

Â Cina Bjork ha fatto fà 'e nummere ê fan alluccanno "Tibet! Tibet!" â fine 'e nu cuncierto a Shanghai. 'O 'llucco è venuto dopp'a na granda performance d''a canzona soja 'Dichiara ll'Indipendenza'. Parlà 'e indipendenza d''o Tibet è visto comme a nu tabbù â Cina, ca guverna 'o territorio d''o 1951.

Doppo 'o cuncierto cierti reazzione negative so' state pubbrecate ncopp'ê sitie web cinese.
"A me Bjork me piace", ha ditto uno, "va buono p'essa â vedè 'e cose 'e n'ata manera, ma ô fà ccà è na mancanza 'e rispetto p''e fan, nu cumpurtamento assaje cazzimmuso".
N'atu fan 'e Bjork 'eva ditto: "s'è cumpurtata comme a na guagliuncella mpicciosa, ca fà senza 'o fà vedè, no comme a Brad Pitt e Richard Gere ca se sape ca vonno 'o Tibet libbero".

'A canzona 'Dichiara ll'Indipendenza' è già stata ausata 'a Bjork per fa vedè cchiù bbuóno cierti ati battaglie pe ll'autodeterminazziona.
'O mese passato ô Giappone Bjork ha dedicato ô Kosovo na nterpretazziona d''a canzona. Po' ha ausato n'ata vota 'a stessa canzona pe gridà evviva â Groenlandia e a ll'Isole Fær Øer, territorie cuntrullate d''a Danimarca.
Ê State Aunite ô 1990 Bjork ha cantato dint'a dduje cuncierte 'e propaganda pe nu Tibet libbero.

Aggio 'a dicere quacche cosa 'e cchiù.
'O Tibet nunn'era manco p''a capa sta perfezziona, ma comme 'a gire e comme 'a vote era nu stato indipendente quanno fuje "libberato" 'a ll'esercito cinese ô 1951. (Lieggete 'a cronologgia d''a BBC). Wikipedia in inglese tene n'articulo ncopp'a ll'invasiona d''o Tibet: "'O guverno cinese, è stato accusato 'e na campagna 'e terrore, dopp'a ll'invasiona, ca ha acciso 1,2 miliune 'e Tibbetane e ha vuttato 'nterra 6000 munasterie. 'O Guverno cinese dice ca nunn'è niente overo. Accuse 'e genocidio, crimine contro a ll'umanità, terrorismo 'e Stato e turtura songo propitamente mò sotto prucesso 'e nu tribbunale spagnuolo."

'O Kosovo, ha dichiarato ll'indipendenza soja 'o 17 febbraio 2008 (liegge ll'articulo ncopp'a BBC NEWS), senza 'e se curà d''e pruteste d''a Serbia, d''a Russia e d''a Cina.

'A Groenlandia è na pruvincia autonoma 'e fora mare d''a Danimarca d'ô 1979. Ô principio è trasuta dint'â Cummunità Europea cu 'a Danimarca ô 1973, ma se n'è asciuta 'a fora ô 1985 doppo c'ha fatto quistiona ncopp'ê deritte 'e pesca e doppo'a nu referendum. Na bella parte d''a pupulazziona d''a Groenlandia tene pe ll'indipendenza.

Ll'Isole Fær Øer songo na pruvincia autonoma d''a Danimarca d'ô 1948. Nun fanno parte 'e ll'Uniona Europea e 'e Danise ca stanno 'e casa dint'a lI'isole Faer Øer nun songo cittadine 'e ll'Uniona Europea. 'A gente 'e llà se sparteno pare pare ntra chille ca teneno pe ll'indipendenza e chille cuntrarie. 'O supporto a ll'indipendenza urdemamente è crisciuto e è l'obbiettivo d''o guverno.

Metto 'a coppa nu link a n'articulo 'e Repubblica assaje priciso ncopp'â quistione, nummenato pure 'a ati blog.

Gioca a fiore e risponne a bastone

2008-03-04T16:13:00.004+01:00

Dint'a sti juorne nc'è stato nu bello scagno 'e lettere ntra 'e Curdinature nazziunale d''a Tavola della pace e 'o candidato premier d''o centro-sinistra italiano Veltroni..

D''a lettera aperta all'on. Walter Veltroni: Pecché 'o munno rummane n'ata vota fora d''a campagna eletturale?

"Doppo tant' anne ca nce simmo mpignate cu tutte 'e forze noste p''a pace, dopp'a n'ata Marcia p''a pace Perugia-Assisi vulimme cercà 'e capì si funziona 'a cultura d''o muvimiento p''a pace. Avimm'a Marcià n'ata vota 'a Perugia nzi a Assisi? P'avè che? Che marciammo a fà p''a pace si 'a puliteca è sempe cchiù cecata e sorda?
'O 7 ottombre passato avimmo marciato cchiù 'e 200.000 'e nuje pe costruì «na puliteca nova e na nova cultura puliteca nunviulenta abbasata ncoppo ê deritte umane». Ma quanno s'è fatta notte, chillu stesso juorno, è sciso pure 'o sipario ncoppo a chillu straordinario evento 'e populo. Giurnale e puliteca ll'hanno ammacchiato 'e subbeto senza dicere e senza fà niente. Comme si niente fosse succieso."

D''a lettera 'e risposta 'e ll'on. Walter Veltroni.

"Pur'je penzo ca c'avimmo mpignà 'e cchiù p''a pace. 'A botta cecata 'e ll'opinione nun trova ata manera pe s'esprimere ca nun fosse viulenza.
Je credo ca 'o nùreco d''o secolo nuosto è nu tozza tozza no ntra civiltà, ma ntra tulleranza e fanatismo. E comme chisto è overo p''e tenzione cchiù grosse ca se passano 'o munno, è overo pure p''e fatte alluccate d''o Paese nuosto: spisso 'a distanza ca nun se regne nun è tanto ntra chi è purtatore 'e questa o chella identità, ma ntra chi sceglie 'e stà annascuso e chi parla, ntra chi s'ha miso 'o cappiello 'e fierro e chi cerca 'e se sbruglià comme pò. L'impegno p''a pace, si nun vò rummanè sule belli parole, parte 'a chesti cunsiderazzione. E accusì è pure pe ll'impegno ca 'a puliteca adda piglà 'nfaccia ê femmene e ê ll'uommene ca nce teneno a campà senza penziere."

Viente 'e guerra ô Suddamerica

2008-03-04T13:12:00.003+01:00

Pecché miliune 'e cittadine culumbiane se ne so' fujute d''e case lloro?

Â Colombia se fa na muntagna 'e cocaina, chesto 'o sapimmo paricchie 'e nuje. Nce sta 'a guerra ma va piscanno chi 'o sape, pure si è na guerra c'ha fatto 40.000 muorte e 3 miliune 'e sfullate, siconda emergenza sfullate ô munno dopp'ô Sudan. Mmiezo a chille quatto o cinche ca sapeno, cierte parleno 'e terrurismo (ca ogge è petrusino ogne menesta), ate arronzeno dicenno narcotraffico, tale e quale comme â Russia s'arronza 'a Cecenia dicenno bandite e comme Cavour arrunzava 'o Sudditalia dicenno brigante.

Álvaro Uribe è 'o Presidente d''a Colombia. 'A quann'è sagliuto ô 2002 ha fatto 'o tuosto 'nfaccia ê ribbelle marxiste d''e FARC, ca c'accedetteno pure 'o pate p''o rapì. 'A puliteca 'e Uribe ll'ha fatto addiventà cumpare e cumpariello cu 'e State Aunite ca ll'hanno dato miliarde e miliarde 'e dollare pe fà 'a guerra ô narcotraffico.

A est d''a Colombia nce sta 'o Venezuela ca pure si nunn'o sanno tutte quante, è uno d''e primme diece prudutture 'e petrolio ô munno. Hugo Chávez è 'o presidente d''o Venezuela, capo pucunare d''a sinistra latino-americana nova, ca è asciuto 'a sotto 'e parole 'e Simón Bolívar e Che Guevara. 'A puliteca 'e Chavez, accussì vicina ô cubbano Fidel Castro, l'ha fatto addiventà "na brutta bestia", pe dicere accussì, 'nfaccia ê State Aunite. Chavez po', pure a isso lle stanno 'ncanna visto ca nun dorme 'a notte pe spartere 'o cuntinente suddamericano d''e puliteche nordamericane (NAFTA, guerra ô terrorismo...).

'E FARC vedeno Chavez comme n'alliato, pe quistione ideologgiche e puliteche.
Chavez e Uribe, lloro nun se ponno vedé. Pure cchiù poco 'a quanno Chavez ha parlato isso cu 'e FARC pe fa libberà cierte ostagge, ca mmiezo nce steva pure chella c'aiutava 'a francesa Ingrid Betancourt, ex candidata ê presidenziale culumbiane.

Fa duje juorne, aerie culumbiane hanno bumbardato nu campo d''e FARC a ll'ata parte d''o cunfine cu ll'Ecuador e hanno acciso a duje d''e cchiù gruosse capibanda d''o muvimiento. 'O presidente 'e ll'Ecuador, Rafael Correa, nu buono alliato 'e Chavez, ha rutto 'e giarretelle c''a Colombia pe prutestà contro 'a viulazziona d''a suvranità nazziunala soja, e ha mannato 'e surdate ô cunfine. Chavez, p'aiutà a Correa, ha schianato diece battagliune 'e carre armate ô cunfine cu 'a Colombia, ha miso sull'attenti ll'aviazziona soja e ha rutto pur'isso 'e giarretelle.
Diceno ll'esperte ca na guerra ntra tutt'e tre 'e Paise è difficile ma putesse succedere.

Chi ne vò capì 'e cchiù, nce sta nu bello fascicolo ncopp'a Reuters AlertNet, in inglese.

Cultura 'e guerra

2008-03-03T15:40:00.005+01:00

'O 14 d''o mese passato 'o principino d''o Regno Aunito, Harry, è juto a fà 'a guerra cu 'e truppe inglese a ll'Afghanistan. 'A cosa nunn'è tanto origginale si pur'isso, comm'a tante, se crede 'e fà 'a pace facenno 'a guerra. Quanno, pe quistione 'e sicurezza giustamente arraggiunate ll'hanno fatto turnà areto primma d''o tiempo, 'e giurnale abbaccate cu 'o guvierno se so' mise ampressa ampressa a raccuntà 'o stommaco ca stu guaglione ha tenuto.

'O giurnale Sun ha stampato nu poster cu 'a figura soja 'e pattuglia a fucile schianato, mmitanno 'a gente a ll'o fa vedè tuorno tuorno. 'O stesso giurnale ncopp'a primma paggina conta ca Harry avesse acciso, o niente niente avesse dato na mana a accidere, trenta Talibbane, cumannanno pe telefono tre attacche pe cielo ncopp'ê pustazzione d''e nemice. Oppure ca Harry, attaccato d''e Talibbane ncopp'a na pustazziona mobbila addò se truvava cu 'e cumpagne suoje, subbeto s'è piazzato annanze a na mitragliatricia pesanta, ca nunn'aveva maje ausato primma, e ha sparato, vuttanno areto ll'attacco.
'O giurnale italiano La Repubblica conta quacche ntrevista.

"S'è purtato troppo buono", fà sapè 'o generale Dannott, capo 'e ll'Esercito. "Ha fatto cunzulà a tutta 'a Gran Bretagna", dice 'o primmo ministro Brown.
P''a parta soja Harry cummenta: "Finalmente tengo 'a pussibbelità 'e fà 'o surdato overo, comm'aggio sempe sunnato. (...) Spero ca pure mammà è cuntenta 'e me, spero ca m'accumpagna d''o cielo".

Quanno se dice 'a ciorta, Lady Diana Spencer, 'a mamma 'e Harry, fuje mmiezo 'e primme a prutestà pe levà 'a miezo 'e mine antiuomo. Pirciò fuje candidata ô premio Nobel p''a pace.
Ogge 'e mine antiuomo songo cchiù 'e 100 miliune pe tutt''o munno, 10 miliune propio in Afghanistan. Ô 2006 'e mine hanno acciso, ferito o sciancato 5.751 perzone, pe nu terzo criature, dint'a 68 Paise e territorie. 'O prezzo 'e na mina varia ntra $3 e $30, levà na mina costa mmece ntra $300 e $1.000. Pe disinnescà 110 miliune 'e mine servesse na spesa 'e 33 miliarde 'e dollare; pe comme se sta sminanno mò, ll'esperte hanno fatto 'o cunto ca servesseno cchiù 'e 1.100 anne p'annettà tutto 'o pianeta, sempe si nisciuna ata mina venesse nterrata. Ma p'ogne mina disinnescata ne veneno nterrate ati 20, 'o 1994 ne fujeno levate 100.000 e semmenate 2 miliune.

Mò, siccome 'a campana se canosce d''o sunà, me piglio 'a cunferenza 'e nun credere ca, si guardasse 'o piccirillo sujo Harry d''o cielo, Lady Diana dicesse: "bello 'e mamma soja!".

Cammino 'e pace

2008-03-02T11:20:00.003+01:00

Ncopp'ô blog Scuole per la pace (Scole p''a pace) aggio truvato chistu post d''o 22 settembre 2004.

"Ll'idea ca vulessemo spartere è ca 'a pace nunn'è na cosa astratta ma quaccosa ca s'avesse 'a custruì nzieme, fatta 'e tanta piezze.

Parlà 'e pace vò dicere pure capì cierti situazzione d''a società, 'e comme chisti situazzione noste stanno 'ncuollo ô resto d''o munno e 'e comme se putesse mantenè 'o carro p''a scesa almeno dint'ê cose cchiù negative.

Pe chesto penzo ca parlà 'e pace vò dicere pure piglià 'e faccia chist'argumente:
- Deritte umane (educà â giustizzia)
- Energia, pruduzzione, cunsumo e nquinamento
- Cunsumo cunsapevole e manere 'e campà
- Deritto â canuscenza, comme spannere 'a canuscenza, prupietà intellettuale
- Digital divide, tecnologgie nove, comme fà canoscere ll'infrommazziona a tutte quante

E parlanno 'e chesto cercà 'e cagnà 'e cumpurtamente nuoste, pure chille piccerille, ma pe primma cosa s'addimannà sempe si chille ca cunsiderammo “besuogne mpurtante” non fosseno overo sfizie o vizie ca nce pàreno a purtata 'e mana ma ca nce levammo ncopp'ê spalle 'e ll'ate.

Pensà primma 'e fà e si è accussì cagnà 'o cumpurtamento nuosto p''o fa addevenì cchiù giusto e cumpatibbele verso 'e besuogne 'e chi tanno tanno soffre 'a famme, 'e privazzione e 'a viulenza.

Pecché "nun nce sta pace senza giustizzia" e nun nce sta giustizzia si nun facimmo 'o cunto ca 'a manera “cchiù meglia” 'e comme campamme nuje è 'a conseguenza 'e secule 'e sfruttamento 'e ati pupulazzione e arrubbamiente 'e risorse ca nun nce apparteneno.

Nunn'è nicessario pirciò 'e se trasfurmà in neoluddiste o turnà pure nuje ô medioevo (v'arricurdate 'e dichiarazzione 'e quaccheduno ca parlava 'e vuttà ll'Iraq dint'ô Medioevo? Dicesse che ll'avimmo bell'e che fatto..) ma è pussibbele spennere 'e n'ata manera 'e sorde nuoste, ammancà sperpere e besuogne.

A fà accussì nun nce purtarrà 'e subbeto nu munno fatto meglio ma nce mettarrà ncopp'â strada justa pe fà 'o munno 'e n'ata manera!"

Parole e catene

2008-03-01T09:47:00.013+01:00

Aret'a tutte 'e belli parole c'ausammo p''e libbre nuoste nce sta na rialtà ca paricchie 'e nuje nun vonno canoscere e nun ne vonno propetamente sapé.
Me sento curiuso a m'arricurdà ca 'a schiavitù è stata abbulita pe ntramente ca leggo chesta parte 'e n'articulo 'e Repubblica.

"'O viaggio mmiezo 'e schiave cinese ca costruisceno 'e Smart appezzuttate è na cosa 'a s''a sunnà dint'â butteglia: se fatica cu nu friddo 'e pazze, dint'a capannune senza calorifero, senza uante, senza mascherine, senza nisciuno tipo 'e prutezzione faccia e faccia cu tuosseche 'e tutte manere. Se fanno turne 'e 12-15 ore 'o juorno e nun nce sta distinzione ntra giuvane, viecchie e femmene. Tutte quante, senza preferenze, dormeno ammassate ncopp'ê liette a castiello dint'ô stabbilimento.
'E machine appezzuttate fernesceno tutte quante a ll'America, ô Canada e in Europa, facimmo 'o cunto 'e ciente 'o juorno.
Â Cina nce stanno na vintina 'e stabbilimente ca copieno 'e stramacchio 'a Smart, senza 'e se piglià manco nu poco 'e scuorno. Tutte piccerelle e tutte chiene 'e schiave-operaje ca senza nisciuna priparazziona faticheno chine 'e riseche pe quatto sorde fetiente.
Â Cina chille ca monteno ll'iPod piglieno nu stipendio 'e 40 euro. Si parlammo 'e stipendie nuje Europeje nun simmo meglie visto ca pure dint'a ll'Europa 'e ll'Est ll'operaje "nuoste" teneno stipendie 'e famme. Vò dicere 380 euro ô mese 'e Pulacche ca costruisceno 'a Fiat 500, 270 euro 'e Sluvacche ca monteno 'a Toyota Aygò, 'a Peugeot 107, 'a Citroen C1 o 'a Renault Twingo chella nova e sule 166 euro pe ll'Ungherese ca fanno nascere ll'Opel Agila e 'a Suzuki Splash."

Certamente ca si 'o libbero mercato 'e nuje mericane, canadise e europeje bluccasse 'e prudutte vennute sottocosto, o si nuje nun c''e accattassemo...

Facimmo ca...

2008-02-29T15:32:00.011+01:00

Videte 'o vidio

Una d''e meglie paggine 'e Stefano Benni dint'a "La compagnia dei Celestini" conta 'a partita 'e "facimmo ca", variante estrema d''a pallastrada ca se joca 5 e 5.

Facimmo ca Napule s'arretrova chiena 'e munnezza, tanto ca nun se pò fà a meno 'e nce cammenà mmiezo, ncoppa, sotto.
Facimmo ca 'e Napulitane, scucciate 'e 15 anne 'e emergenza-munnezza, accummenceno a dà 'ncapa ô maluguvierno.
Facimmo ca 'a pupulazzione và truvanno 'e apparà na gestione d''a munnezza fatta cu modernità, sparagnanno mballagge inutile, ausanno n'ata vota 'e vuote, facenno 'a culletta differenziata, 'o trattamento d''a munnezza tosseca, 'o riciclaggio 'e carta, lignamme, vrito, metalle e plasteca, 'o compostaggio d''e remmasuglie organiche e, sulo adoppo a tutto chesto, jettanno dint'â discarica chillu 10% ca rummane d''a munnezza solida urbana e ca nun fà cchiù male a nisciuno.
Facimmo ca 'o guverno pretenne mmece 'e fà 'a termovalorizzazzione cancerogena d''a munnezza acussì comm'è, pure si 'a ggente dice ca NO.
Facimmo ca chille ca cu civiltà e pacificamente prutesteno, guardannese 'e fatte lloro e prupunenno suluzzione bbone mmece 'e suluzzione malamente, veneno mazzuliate d''e guardie.
Facimmo ca aumenta 'a gente ca prutesta pacificamente e ca aumenteno pure 'e mazzate. E ca nce stanno, embè, ati pruteste e ati mazzate.
Facimmo ca 'a prutesta pacifica addeventa ribbellione...

Facimmo ca 'a ggente d''o Delta d''o Niger vedeno 'o petrolio lloro sfruttato d''e multinazzionale 'e l'occidente ma nun vedeno nu sordo, cuntinuanno a campà cu 'a famma cchiù nera.
Facimmo ca ll'accorde cummerciale diceno ca 'o Pakistan se pò accattà 'e tecnologgie 'a ll'Europa ma po' nun pò vennere a ll'Europa 'e prudutte agricole soje pe se pavà 'e tecnologgie accattate.
Facimmo ca ê Maldive guverna 'a 25 anne nu dittatore nepotista, n'ommo 'e niente ca turtura e fa scumparì 'a povera gente ca nun se vo stà, per ntramente ca 'e turiste europeje e mericane se ne vedeno buono ncopp'â spiaggia.
Facimmo ca 'o Botswana stanno accussì nguaiate 'e AIDS uommene e femmene ca 'a speranza media 'e vita nunn'arriva a 40 anne, ma ca 'e case farmaceutiche europeje e mericane nun vonno avascià 'o prezzo d''e medicine (e 'e sorde ca s'abbuscano), rummanenno mpicciate tutte 'e puverielle ca se vulessero curà.
Facimmo ca...
Facimmo ca...
Facimmo ca...

Giustizzia, libbertà, sviluppo!

2008-02-29T10:41:00.013+01:00

Videte 'o vidio e lieggete 'e parole (in inglese)

Chesta è n'abbiata e ogne abbiata è mpicciusa. Mpicciuso è parlà 'e pace senza dicere parole vacante. Je c'aggio miso 10 anne a capì 'a pace che d'è, si pure ll'aggio capito. E comme tutte quante, je manco saccio ancora buono comme se putesse costruì...

Cu sicurezza saccio chillo ca nunn'è!
'A pace nunn'è nu rialo d''o cielo e nunn'è na bella cuncessione d''o Rre.
'A pace dipenne 'a ll'uommene, sule 'a ll'uommene, 'a chillo ca ll'uommene cercheno e 'a comme se porteno ll'uno cu ll'ato. Pirciò 'a spunsabbeletà è 'e tutte quante, a chi le piace e a chi nun le piace.

'A pace è nu deritto funnamentale 'e l'ommo stabbelito 'a ll'Assemblea Generale 'e ll'ONA (Organizzazzione d''e Nazione Aunite) 'o 1984. P''a costruì è funnamentale "abbandunà 'a forza pe dinto 'e relazzione internazzionale" (Dichiarazzione ncopp'ô deritto d''e popole â pace, ONA, 1984).
Ma si pure arrevassemo nu journo a fa' sta cosa, chisto fosse sulo nu passo annanze pecchè guerre e tenzione nun moreno cu na firma ncopp'a nu trattato internazzionale. E po' ogge nu cuofano 'e cunflitte nun songo inter-nazzionale ma songo intra-nazzionale, ntra gruppe 'e nu stesso stato.

Martin Luther King 'o 1963, dinto 'a na Lettera d''o carcere d''e soje, faceva 'a differenza ntra "na pace negativa ch'è 'a mancanza 'e tenzione" e "na pace positiva ch'è 'a presenza 'e giustizzia".
Dint'a chill'anne Malcom X diceva: "Nun se ponno spartere pace e libbertà pecché nisciuno pò stà 'npace si nun tene 'a libbertà."
'O Papa Paolo VI cu buono criterio, dinto a ll'enciclica Populorum Progressio d''o 1967, metteva 'a pace nzieme cu 'o "progresso d''e pupulazzione cchiù puverielle" e 'a "giustizzia sociale ntra nazzione".

Ogge sulo 'e criature e 'e mbrugliune parleno 'e pace cu parole vacante. Pe tutto 'o munno chille ca fanno e chille ca penzeno ncopp'â pace parleno 'e giustizzia, libbertà e sviluppo.
'A pace esiste addò nce stà 'a giustizzia, 'a libbertà e 'o sviluppo.
'A pace esiste quanno tutte quante so' libbere 'e se sviluppà comme le pare a lloro, senza 'e se fà 'o sanghe amaro p'arrivà a attené chillo ca teneno 'o deritto.

Na cultura 'e pace

2008-02-26T12:44:00.017+01:00

'O BIPPIblog fatica ncopp'a ll'educazzione â cultura d''a pace.
Nunn'è na cosa ca me songo ammentato je sulo.

'O cuncetto 'e Cultura d''a Pace è stato furmulato d''o Cungresso Internazzionale ncopp'â Pace â Costa d'Avorio ô 1989. 'O Cungresso arraccumannaje a ll'UNESCO 'e faticà pe costruì na visiona nova d''a pace abbasata ncopp'ê valure universale 'e rispetto p''a vita, 'a libbertà, 'a giustizzia, 'a solidarietà, 'a tolleranza, 'e deritte umane e ll'eguaglianza ntra ommo e femmena.Po' hanno fatto quistione ê cchiù gruosse livelle internazzionale pe cchiù 'e diece anne ntra cungresse, forum, cunferenze, cummissione e assemblee, nu sforzo diplomatico accussì gruosso p'arrivà â risoluzzione 53/243 d''o 13 settembre 1999 quanno ll'Assemblea Generale d''e Nazzione Aunite adottaje 'a Dichiarazziona pe na Cultura d''a Pace.

Chesta dice ca "d''o mumento ca 'e guerre accummenceno dint'â capa 'e ll’uommene, è dint'â mente umana ca s'adda abbià a costruì 'a pace”.

L'educazziona â cultura d''a pace è stu "costruì 'a pace dint'â capa 'e ll’uommene".

Chist'obbreco educativo "attocca a genitore, maestre, puliteche, giurnaliste, â cchiesa, a penzatore, scienziate, filosofe, artiste, miedeche, a chille che fanno ll'umanitario, a tutt''e specie 'e capibanda, comme pure a ll'Organizzazzione Non Guvernative". (art.8 d''a Dichiarazziona)

Tutte chille che so' parte d''a società civile so' chiammate d''a cchiù grossa autorità mondiale a guidà 'e giuvane verso na cultura 'e pace, verso nu "nzieme 'e valure, atteggiamente, tradizzione, manere 'e se purtà abbasate ncopp'ô rispetto p''a vita, ncopp'â fine d''a viulenza e ncopp'â prumuzziona d''a pratica d''a nonviulenza cu 'll'educazziona, 'o dialogo e 'a cooperazziona". (art.1 d''a Dichiarazziona)

Ll'educazzione â cultura d''a pace è dà ê giuvane ll'esempio pe 'e purtà a se ncuntrà e no a se scuntrà, pe 'e purtà ô dialogo e no â lotta, â cumprensiona e no ô pregiudizio, â legge e no â camorra, a rispettà 'a diversità e no a ne fà nu diavulo. Costruì chisti valure dint'â capa d’’e giuvane tutte nzieme, cu pacienza, a tutt''e pizze d''a vita loro 'e tutte 'e juorne.